Այսօր Տուբերկույլոզի դեմ պայքարի համաշխարհային օրն է․ Արցախում նկատվում է հիվանդացության դեպքերի նվազեցում

Մարտի 24-ը Տուբերկույլոզի դեմ պայքարի համաշխարհային օրն է։ Այս առիթով ԱՀ առողջապահության նախարարությունը հաղորդագրություն է տարածել․

«Տուբերկուլյոզը մարդկությանը հնուց հայտնի հիվանդություններից մեկն է: 19-րդ դարում՝ 1882 թվականին, տուբերկուլյոզի հարուցիչը հայտնաբերեց և հիվանդության վարակիչ բնույթը հաստատեց գերմանացի գիտնական Ռոբերտ Կոխը: 1982թ-ից՝ տուբերկուլյոզի հարուցիչի հայտնաբերման օրը՝ մարտի 24-ը, նշվում է որպես տուբերկուլյոզի դեմ պայքարի օր:

Տուբերկուլյոզի պրոֆիլակտիկայի հիմքը այսօրվա դրությամբ հանդիսանում է ԲՑԺ-ի վակցինացիան: Այն անց է կացվում նորածիններին, ծննդատանը՝ 3-5 օրը ծնվելուց հետո: 7 և 14 տարեկանում անց է կացվում ռևակցինացիա:

Ներկայումս տուբերկուլյոզի դեմ պայքարի հիմնական արդյունքները տալիս են տուբերկուլինոդիագնոստիկան (առաջնահերթ երեխանների և դեռահասների մոտ) պրոֆիլակտիկ ֆլյուորոգրաֆիան: Երեխանների, սկսած՝ 15 տարեկանից և մեծահասակների տուբերկուլյոզի հայտնաբերման համար վաղ շրջանում կատարվում է ամենամյա ֆլյուորոգրաֆիկ հետազոտություն:

Դեռևս 2012թ. ԱՀ Կառավարության և ԱՀ առողջապահության նախարարության ջանքերով ձեռք բերված շարժական թվային ֆլյուորոգրաֆիկ սարքի միջոցով «Հակապալարախտային դիսպանսեր» ՊՈԱԿ կողմից իրականացվում են պլանային կանխարգելիչ ֆլյուորոգրաֆիկ հետազոտություններ ք. Ստեփանակերտի ուսումնական հաստատություններում, ԱՀ շրջկենտրոններում և մի շարք գյուղական, այդ թվում հեռավոր բնակավայրերում, որը կրում է շարունակական բնույթ և 2019թ.-ին «Հակապալարախտային դիսպանսեր»-ը համալրվել է նոր թվային ֆլյուորոգրաֆիկ սարքով: Այս ծրագրի իրագործումը թույլ է տալիս հայտնաբերել ոչ միայն տուբերկուլյոզի դեպքերը վաղ շրջանում, այլև հայտնաբերել շնչառական օրգանների այլ հիվանդություններ՝ բարորակ և չարորակ ուռուցքներ, թոքաբորբեր և այլն:

Արցախի Հանրապետությունում տուբերկուլյոզի առումով հետազոտումը և բուժումը իրականացվում է պետպատվերի շրջանակներում անվճար, «Հակապալարախտային դիսպանսեր» ՊՈԱԿ կողմից: ԱՀ ԱՆ և «Հակապալարախտային դիսպանսեր» ՊՈԱԿ համագործակցում են ՀՀ ԱՆ Տուբերկուլյոզի դեմ պայքարի Ազգային կենտրոնի հետ:

Երկար տարիների ընթացքում ինֆեկցիայի պրոֆիլակտիկային ուղղված բոլոր միջոցառումները նպաստել են հիվանդության իջեցմանը: Արցախում վերջին տարինների ընթացքում նկատվել է տուբերկուլյոզով հիվանդացության դեպքերի նվազեցում:
Տուբերկուլյոզի պրոֆիլակտիկայում հաջողության գրավականը առողջ ապրելակերպն է»:

Նշենք, որ տուբերկույլոզը շարունակում է մնալ ամենամահաբեր վարակիչ հիվանդությունը ցածր ու միջին եկամտային մակարդակով երկրներում։ Աշխարհում ամեն օր տուբերկուլյոզից մահանում է 4000 մարդ, որից 700-ը երեխաներ են։ Սա նշանակում է, որ ամեն րոպե 3 հոգի մահանում է տուբերկուլյոզից։