Կա մի նուրբ սահմանագիծ՝ մինչ աղքատությունը

Ի՞նչ է աղքատությունը....

Ինչպե՞ս հաղթահարել աղքատությունը….

Ե՞րբ կհաղթահարվի աղքատությունը....

Որտե՞ղ է ծնվում աղքատությունը....

Այս և նմանատիպ հարցադրումները, ցավոք, դեռ երկար օրակարգային կլինեն մեր երկրում:

Հայաստանի Հանրապետության նախորդ գրեթե բոլոր կառավարությունները այս ուղղությամբ որոշակի քայլեր ձեռնարկել են:

20-25 տարիների ընթացքում մշակվել են կառավարությունների ռազմավարություններ և քաղաքականություններ, ուղղորդվել հսկայական բյուջետային, դրամաշնորհային գումարներ, որպես նվիրատվություն ստացված հսկայական միջոցներ, եղել են համատեղ ծրագրեր Հայաստանում գործող և Հայաստանի հետ համագործակցող բազմաթիվ միջազգային կազմակերպությունների և կառույցների հետ:

Հայաստան են հրավիրվել մասնագետների, փորձագետների և խորհրդատուների բազմաթիվ պատվիրակություններ, անցկացվել են բազմաթիվ քննարկումներ, խորհրդակցություններ, հանձնաժողովների նիստեր, բյուջետային միջոցներով օտարերկրյա փորձի ուսումնասիրման նպատակով արտասահման են գործուղվել տասնյակ մասնագետներ, հրատարակվել են հարյուրավոր ձեռնարկներ, ուսումնասիրության արդյունքներ, հոդվածներ, սեղմագրեր և այլն:

Բազմաթիվ այլ դժվարագույն հիմնահարցերի շարքում Հայաստանի Հանրապետության կառավարությունը ժառանգել է նաև այս խնդիրը:

Ինչպիսի՞ն կլինեն կառավարության արդյունքները գործունեության այս ոլորտում:

Այս հարցադրումը միանշանակ պատասխան չունի՝ պայմանավորված նաև գործոններով, որոնք նախկինում չեն եղել (համավարակ, արտակարգ դրություն, հեռավար աշխատանք, վեբինար քննարկումներ և այլն):

Այնուամենայնիվ, կան պարզ ճշմարտություններ, որոնք մակերեսին են, քննություն բռնած:

Պետական կառավարման և տեղական ինքնակառավարման համակարգերի պաշտոնյաները միշտ պետք է հիշեն, որ աղքատությունը անցանկալի հյուր է բոլոր այն բնակավայրերում, որտեղ կարևորվում են մարդկանց հոգսերը:

Կա մի նուրբ սահմանագիծ՝ մինչ աղքատությունը.

Երբ համայնքում բազմազավակ ընտանիքի համար փոքրիկ տանը կից ժամանակին կառուցվում է ևս մեկ-երկու սենյակ կցակառույց, երբ վարձավճարի պատճառով ԲՈՒՀ-ից դուրս մնալու սպառնալիքի իրականացումից հինգ րոպե առաջ վրա է հասնում օգնությունը, երբ վարկերի վճարումից, հնարավորությունների իսպառ բացակայությամբ պայմանավորված, խուսափելու համար վերջին պահին կանխվում է քաղաքացու միակ ունեցվածքի՝ բնակարանի վաճառքը և այլն:

Հ.Գ. Հայաստանի Հանրապետության բազմաթիվ բնակավայրերում պահպանվում է ավանդույթը.

առաջիկա օրերի կամ շաբաթների համար՝ ընտանիքի համար թխվող լավաշի առաջին քանակից, երեխաների օգնությամբ, անպայման ուղարկվում է համեմատաբար չունևոր տներին:

Ձոնիկ Մարգարյան