Ճապոնիան մինչև 3 հազար կիլոմետր հեռահարության հրթիռներ Է մշակելու

Ճապոնիայի կառավարությունն ուսումնասիրում Է մինչև 3 հազար կիլոմետր հեռահարության կառավարվող հրթիռների մշակման և երկրի տարբեր մասերում, այդ թվում՝ Հոկայդոյում դրանց հետագա փուլային տեղակայման հարցը:

Այդ մասին «Արմենպրես»-ը տեղեկանում Է «ՌԻԱ Նովոստի» գործակալությունից: Ներկայում Ճապոնիայի սպառազինության կազմում գտնվող հրթիռների արձակման առավելագույն հեռահարությունը կազմում Է 100 կիլոմետրից քիչ ավելի: Դրանք «12 տիպի հականավային հրթիռներ են»: Երկրի պաշտպանունակության բարձրացման ծրագրի շրջանակներում պաշտոնական Տոկիոն պլանավորում Է դրանք արդիականացնել թռիչքի հեռավորությունը մինչև հազար կիլոմետր և փոքր-ինչ ավելի մեծացնելու նպատակով: Նաև քննարկվում Է նոր հրթիռների, այդ թվում՝  2-ից մինչև 3 հազար կիլոմետր գործողության շառավղով գերձայնային հրթիռների մշակման հնարավորությունը:

Ըստ «Մայնիտի» թերթի աղբյուրների՝ դրանց հետագա տեղակայումը ներառելու Է երեք փուլ: Առաջին փուլում շուրջ 1000 կիլոմետր գործողության շառավղով կատարելագործված հրթիռները տեղակայվելու են Նանսեյ կղզում: Երկրորդ փուլում շուրջ 2 հազար կիլոմետր հեռահարության հրթիռների տեղակայումը ենթադրվում Է Հոսյու կղզում: Երրորդ փուլը (հրթիռների տեղակայումը հյուսիսային Հոկայդո կղզում) ենթադրվում Է շուրջ 3 հազար կիլոմետր հեռահարության հրթիռների մշակումից հետո: Հոկտեմբերի սկզբին Ճապոնիայի վարչապետ Ֆումիո Կիսիդան հայտարարել Էր, որ Տոկիոն քննարկում Է բնակչության պաշտպանության բոլոր տարբերակները, ներառյալ՝ պատասխան հարվածի հնարավորությունը: