Ճապոնիայի արտակարգ և լիազոր դեսպանի հետ քննարկվել է շրջակա միջավայրին վերաբերվող մի շարք հարցեր

Այսօր ընդունել եմ Հայաստանի Հանրապետությունում Ճապոնիայի արտակարգ և լիազոր դեսպան Ֆուկուսիմա Մասանորիին։Այս մասին գրել է շրջակա միջավայրի նախարար Հակոբ Սիմիդյանը:

Ողջունելով պարոն դեսպանին Շրջակա միջավայրի նախարարությունում ՝ նախ շնորհակալություն եմ հայտնել Ճապոնիայի կառավարությանը՝ տարբեր ոլորտներում Հայաստանի Հանրապետությանը ցուցաբերած շարունակական աջակցության համար։ Հայաստանի Հանրապետության և Ճապոնիայի կառավարությունների մասնավորապես շրջակա միջավայրի ոլորտում համագործակցությունը հաստատուն է և արդյունավետ։

Ճապոնիայի կառավարության օժանդակությունը թե՛ մասնագիտական կարողությունների զարգացման, թե՛ տեխնիկական աջակցության առումով շատ կարևոր է ու թիրախային։

Դեսպանն իր հերթին շնորհակալություն է հայտնել ընդունելության համար և վերահաստատել, որ Ճապոնիայի համար Հայաստանը կարևոր գործընկեր է համագործակցելու և զարգացնելու համար օրենքի գերակայության գաղափարը։

Հանդիպման ընթացքում անդրադարձ է կատարվել շրջակա միջավայրի ոլորտում համագործակցության ծրագրերին և այդ համագործակցության ընդլայնման հեռանկարներին։

Մասնավորապես անդրադարձել եմ սնդիկի՝ որպես թափոն Հայաստանում վերամշակելու կամ վնասազերծելու հնարավորություներին և դրա իրագործման գործընթացում տեխնիկական սարքավորումների ձեռքբերման ուղղությամբ Ճապոնիայի հետ համագործակցության հնարավորությանը։

Անդրադարձ է կատարվել Ճապոնիայի կառավարության կողմից հաստատված «Grant Assistance for Grassroots Human Security Projects (GGP)» ծրագրի շրջանակներում ներկայացված Լոռու մարզում անտառների վերականգնման նպատակով ջերմոցների և հակակարկտային ցանցի ստեղծման վերաբերյալ դրամաշնորհային ծրագրի պայմանագրին, որի շրջանակում «Իմ անտառ Հայաստան» ԲՀԿ-ն կառուցելու է 506քմ տարածքով անտառային տնկիների ջերմոց Գուգարքում տնկարանի տարածքում, ինչպես նաև տեղադրելու է հակակարկտային ցանց նույն տնկարանի 6600քմ տարածքի վրա։

Քննարկվել է ՄԱԿ-ի զարգացման ծրագրի հայաստանյան գրասենյակի կողմից Շրջակա միջավայրի նախարարության (ի դեմս «Հիդրոօդերևութաբանության և մոնիթորինգի կենտրոն» ՊՈԱԿ-ի), ինչպես նաև Տարածքային կառավարման և ենթակառուցվածքների նախարարության և Արտակարգ իրավիճակների նախարարության հետ սերտ համագործակցությամբ իրականացվող «Աջակցություն Հայաստանում կլիմայական ռիսկերի դիմակայունությանն ուղղված ազգային ներդրումներին» ծրագրին, որը ֆինանսավորվում է Ճապոնիայի կառավարության կողմից։

Քննարկվել է Ճապոնիայի օդերևութաբանական գործակալության հետ համագործակցության խթանումը՝ նպատակ ունենալով ուսումնասիրել, տեղայնացնել և ներդնել ճապոնական գործնական փորձը կապված հիդրոօդերևութաբանական վտանգավոր երևույթների, վաղ նախազգուշացման համակարգերի և ռիսկերի մոդելավորման մասով։

Պայմանավորվածություն ենք ձեռք բերել շարունակել հանդիպումները և քննարկումները՝ զուգորդված ավելի առարկայական գործընթացներով։

Հանդիպման ավարտին պարոն դեսպանին նվիրել եմ «Կովկասյան ընձառյուծի» արծաթե հուշադրամ՝ ի երախտագիտություն շրջակա միջավայրի ոլորտում արդյունավետ համագործակցության։