Նոր նախագծով ՀՀ-ում ովքեր կկարողանան զենք ձեռք բերել, և ինչ է դրա համար նախատեսվում. պատգամավորը մանրամասնում է

ՀՀ Ազգային ժողովի «Քաղաքացիական պայմանագիր» խմբակցության պատգամավորներ Վիլեն Գաբրիելյանը, Անդրանիկ Քոչարյանը և Արմեն Խաչատրյանը շրջանառության մեջ են դրել «Զենքի շրջանառության կարգավորման մասին» Հայաստանի Հանրապետության նոր օրենքի նախագիծը։

Ըստ նախագծի՝ ՀՀ-ում զենք ձեռք բերելու հնարավորություն կարող են ունենալ վարչապետի աշխատակազմը, պետական ռազմականացված կազմակերպությունները, հատուկ կանոնադրական խնդիրներ իրականացնող իրավաբանական, զենքի առեւտրով զբաղվող իրավաբանական, զենքի հավաքածուներ կազմելով կամ դրանք ցուցադրելով զբաղվող իրավաբանական կամ ֆիզիկական անձինք, լիցենզավորված ռազմամարզական, սպորտային հրաձգության և որսորդական տնտեսություն վարող կազմակերպությունները, Հայաստանի Հանրապետության և օտարերկրյա քաղաքացիները:

Նախագծի համահեղինակ Վիլեն Գաբրիելյանը, «Հայկական ժամանակի» հետ զրույցում անդրադառնալով նախագծի առջև դրված նպատակներին, նկատում է՝ օրենսդրական փոփոխությունները պետք է կանոնակարգեն եղած իրավահարաբերությունները քաղաքացիական զենքի շրջանառության ոլորտում, որոնք մինչ այս պահը պատշաճ կարգավորված չեն կամ հակասական են:

Դիտարկմանը՝ նախագծի հրապարակումից հետո կարծիքները բաժանվել են երկու մասի. ոմանք կարծում են՝ նոր նախագծով ՀՀ-ում սպանությունների և բռնությունների թիվը կավելանա, մյուս մասին էլ կարծում է, որ կարևոր նախագիծ է, պատգամավորն ընդգծում է՝ նրանք, ովքեր կարծում են, թե սրանով սպանությունների և բռնությունների թիվը կավելանա, պարզապես հուզական դաշտում են հարցը դիտարկում:

«Չեմ ուզում էմոցիոնալ կարծիքներին անդրադառնալ: Այս օրենքի նախագիծը քննարկվել է մի շարք մասնագետների հետ, ուսումնասիրվել են ներկայիս օրենքի հնարավորությունները, ամեն դետալ մանրամասն մշակվել է: ՀՀ-ի ներկայիս օրենսդրությամբ զենքի գործածումն ավելի ազատական է: ՀՀ յուրաքանչյուր քաղաքացի, ում 18 տարին լրացած է, կարող է դիմել որսորդական միություն և ստանալ թույլտվություն՝ զենք գնելու: Մտավախությունը, թե սպանությունները կշատանան Հայաստանում, հիմնված են միայն էմոցիաների վրա և փաստարկված չեն: ՀՀ-ի վիճակագրությունը ցույց է տալիս, որ օրինական զենքով հանցագործությունների քանակը 000,1 տոկոս է կազմում»,- նշում է պատգամավորը:

Անդրադառնալով նրան, որ սկզբնական շրջանում խոսվում էր սահմանամերձ շրջանների բնակիչների՝ զենք ձեռք բերելու հնարավորությունների մասին, ոչ թե բոլորի՝ նախագծի համահեղինակն ասում է՝ քննարկումներ են ունեցել, որի արդյունքում որոշել են փոփոխություններ մտցնել. «Հասկացել ենք, որ մինչ այժմ գործող օրենքը չի արտացոլում հանրային այն վերաբերմունքը, որը կա զենքի շրջանառության ոլորտում: Որոշվել է, որ այն ունի լուրջ կարգավորման կարիք»:

Սահմանվելու են զենք ձեռք բերելու պարտադիր քննական կարգի հիմքեր, ասում է Գաբրիելյանը, բաղկացած թեորետիկ և պրակտիկ հատվածներից: Զենք ձեռք բերելու քննությունն անցկացնելու է ՀՀ ոստիկանությունը:

«ՀՀ ոստիկանությունը և երկրում գործող ռազմամարզային ակումբները, որոնք այժմ գործում են և բավականին մեծ թափով զարգանում, միասին պետք է համագործակցեն: Կոնկրետ քննությունն անցկացնելու են ՀՀ ոստիկանության լիցենզավորված անձինք»,- ասում է պատգամավորը:

Անդրադառնալով քաղաքացիների՝ զենք ձեռք բերելու իրավունքներին՝ Գաբրիելյանը հստակեցնում է. «Քաղաքացիական զենք ձեռք բերելու իրավունք կունենա Հայաստանի Հանրապետության 21 տարին լրացած քաղաքացին Հայաստանի Հանրապետության ոստիկանությունից քաղաքացիական զենք ձեռք բերելու համապատասխան թույլտվություն ստանալուց հետո: Թույլատրվելու է ձեռք բերել, գրանցել և հաշվառել ոչ ավելի, քան 10 միավոր քաղաքացիական զենք, իսկ եթե կազմում են զենքի հավաքածու, ապա՝ անսահմանափակ թվով հրազեն և մարտական սառը զենք»:

Նախագծի համահեղինակի խոսքով՝ ներկայիս օրենքով սահմանված է, որ քաղաքացին կարող է ունենալ 5 միավոր քաղաքացիական զենք, սակայն նոր նախագծով թիվն ավելացրել են. «Պատճառն այն է, որ մարդիկ, որոնք ունեն զենքի նկատմամբ յուրահատուկ վերաբերմունք, չեն սահմանափակվում զենքի մեկ տեսակով և ցանկանում են շատ տեսակներ ունենալ»:

Ըստ Վիլեն Գաբրիելյանի՝ թյուր է այն կարծիքը, թե բոլորը կարողանալու են զենք օգտագործել, պահելու են իրենց մոտ և օգտագործեն որտեղ և երբ պատահի. «Այսօրվա օրենքով էլ արգելվում է հանրային վայրերում զենք պահել, այնպես չէ, թե փոփոխություններով թույլատրվելու է: Զենքի պահպան, օգտագործման, տեղահանման հիմքերը օրենքում ներդրված են, կարգավորումներով հստակեցված»:

Հարցադրմանը՝ անախորժ պատմություններից զերծ մնալու համար ո՞ր կառույցը պետք է հետևի՝ արդյոք քաղաքացիները պահպանո՞ւմ են բոլոր կանոնները զենքը ձեռք բերելու, տեղափոխելու մասով, թե՞ ոչ, «Քաղաքացիական պայմանագիր» խմբակցության պատգամավորն տեղեկացնում է՝ հսկողությունն իրականացնելու է ոստիկանությունը:

«Կանոնների խախտման դեպքում խիստ պատիժներ են գործելու»,- նկատում է նա:

Ըստ Վիլեն Գաբրիելյանի՝ նախագիծը իր դրական ազդեցությունը կունենա նաև տնտեսական առումով. «Առևտրի տեսանկյունից կարող է դիտվել տնտեսական ակտիվություն: Կարող են ավելի մեծ թվով զենք վաճառող խանութներ բացվել: Ներկայիս օրենքով զենք ներկրողները և վաճառողները բազմաթիվ սահմանափակումների առաջ են կանգնում: Իսկ այժմ մենք հստակեցնում ենք այս գործընթացը: Դաշտը որոշակի առումով ավելի կազատականացվի»: