Որոնք են իմունային համակարգի ամրապնդման համար անհրաժեշտ ամենակարևոր վիտամիններն ու հանքանյութերը

Տարվա ցուրտ եղանակներին մարդկանց իմունային համակարգը հաճախ է թուլանում, ինչը հանգեցնում է դիմադրողականության անկման ու բարձրացնում է վարակման հավանականությունը։ Նման խնդիրներից խուսափելու համար հարկավոր է բարձրացնել իմունիտետը, իսկ այս հարցում լավագույն օգնականները կարող են լինել վիտամիններն ու հանքանյութերը։

Վերջերս British Medical Journal (BMJ) պարբերականում հրապարակված նոր հետազոտությունը ցույց է տվել, որ որոշակի վիտամինների ու հանքանյութերի բավարար գործածությունը կապված է շնչառական համակարգի հիվանդությունների դեպքերի նվազման և վերականգնման համար օրգանիզմին անհրաժեշտ ժամանակահատվածի կրճատման հետ։

Մասնագետների խոսքով՝ սննդակարգը յուրահատուկ դեր է խաղում վարակման վտանգի նվազեցման հարցում, սակայն առ այսօր պարզ չէ, թե ինչպես է այն իրականում խթանում իմունիտետը։ Այնուամենայնիվ հետազոտությունները ցույց են տվել, որ կան վիտամիններ ու հանքանյութեր, որոնք օգնում են ամրապնդել իմունային համակարգը, ուստի դրանցով հարուստ մթերք սննդակարգում ներառելը կարող է շատ օգտակար լինել։

Ձեր ուշադրությանն ենք ներկայացնում լավագույն վիտամիններն ու հանքանյութերը, որոնցով հարուստ մթերք օգտագործելը թույլ կտա ամրապնդել իմունային եղանակը տավա ցուրտ եղանակներին։

Վիտամին А

Այս տարրի օրական սահմանված չափաբաժինը տղամարդկանց դեպքում 700 մգ է, իսկ կանանց դեպքում՝ 600-ը։ Այս վիտամինի ընդունումն օգնում է պահպանել աղեստամոքսային տրակտի, աչքերի, քթի ու թոքերի լորձաթաղանթների ամբողջականությունը, իսկ լորձաթաղանթներն իմունային պաշտպանության «առաջնագիծն» են։ Բացի այդ, վիտամին А-ն մասնակցում է նաև հակամարմնինների արտադրմանը, իսկ դրանք վարակների դեմ պայքարող հիմնական տարրերն են։

Վիտամին А-ի լավագույն աղբյուրներն են գազարը, դդումը, քաղցր կարտոֆիլը, կաղամբը, ձկան յուղը, լյարդը, կարագը, ձվի դեղնուցն ու կաթը։

Վիտամին С

Վիտամին С-ի օրական սահմանված չափաբաժինը տղամարդկանց ու կանանց դեպքում նույնն է՝ 40 մգ։ Չնայած, որ առ այսօր չկան ապացույցներ, որ այն կանխում է ռեսպիրատոր հիվանդությունների զարգացումը, այնուհետև հայտնի է, որ այս տարրը խթանում է հակավիրուսային նյութի՝ ինտերֆերոնի սինթեզն ու թեթևացնում է վերին շնչուղիների վարակների ու վիրուսային հիվանդությունների բուժումը։

Այս տարրի լավագույն աղբյուրներն են կարմիր պղպեղը, ցիտրուսային մրգերը, մասուրը, կիվին և կաղամբը։

Վիտամին D

Այս տարրի օրական սահմանված չափաբաժինը 10 մգ է ինչպես կանանց, այնպես էլ տղամարդկանց համար։ Այն ազդում է իմունային համակարգի բջիջների վրա՝ խթանելով Т-բջիջների ու մակրոֆագերի գործառույթները և դրանով իսկ ամրապնդելով իմունային համակարգը։ Օրգանիզմում այս վիտամինի ցածր մակարդակը բարձրացնում է վերին շնչուղիների վարակների հավանականությունը, ուստի դրա ցուցանիշներին հարկավոր է շատ մեծ ուշադրություն դարձնել։

Վիտամին D-ի լավագույն աղբյուրն արևի ճառագայթներն են, քանի որ այն առաջին հերթին սինթեզվում է մարդու օրգանիզմում արևի ճառագայթների տակ, սակայն ձմռանը հարկավոր է կիրառել նաև հավելյալ աղբյուրներ, ուստի խորհուրդ է տրվում սննդակարգը հարստացնել յուղոտ ձկնատեսակներով, լյարդով, հավկիթով ու սնկերով։

Վիտամին Е

Այս տարրի օրական սահմանված չափաբաժինը տղամարդկանց դեպքում 4 մգ է, իսկ կանանց դեպքում՝ 3 մգ։ Դրա՝ իմունային համակարգն ամրապնդելու կարողությունները գիտնականները բացատրում են նրանով, որ այն նպաստում է իմունային բջիջների (օրինակ՝ մակրոֆագեր, Т-բջիջներ, В-բջիջներ) քանակության կարգավորմանն ու աշխատանքի բարելավմանը։

Վիտամին Е-ով հարուստ լավագույն սննդամթերքի տեսակներն են արևածաղկի սերմերը, նուշը, սպանախը, ավոկադոն, ձիթայուղն ու արևածաղկի չզտված յուղը։

Ցինկ

Տղամարդկանց խորհուրդ է տրվում օրական օգտագործել 9,5 մգ ցինկ, մինչդեռ կանանց՝ 7 մգ։ Գիտնականները նշում են, որ այս հանքանյութը բարելավում է օրգանիզմի իմունային պաշտպանությունը վիրուսային հիվանդություններից, ինչպես նաև հակաբակտերիալ ազդեցություն է ունենում օրգանիզմի վրա։

Ձմռանը ցինկի լավագույն աղբյուրները կլինեն անյուղ կարմիր միսը, հնդկահավի միսը, կինոան, ընկուզեղենը և հավկիթը, ուստի դրանցով հարուստ սննդակարգը շատ օգտակար կլինի իմունային համակարգի համար։

Սելեն

Այս հանքանյութի գործածության սահմանված նորման տղամարդկանց համար 75 մկգ է, իսկ կանանց համար՝ 60 մկգ։ Սելենը շատ կարևոր է հակամարմինների սինթեզի, ինչպես նաև Т-լիմֆոցիտների ու վիրուսային և բակտերիալ հիվանդությունների հարուցիչների դեմ պայքարող բնական բջիջների սինթեզի համար, ուստի դրա բավարար գործածությունը կենսական նշանակություն ունի օրգանիզմի համար։

Սելենով հարուստ են բրազիլական ընկույզը, թյունոսը, տոֆուն ու ամբողջական հացահատիկը, ուստի սննդամթերքի այս տեսակները հարկավոր է անպայման ներառել սննդակարգում։