Ինչի մասին է Էրդողանի՝ Նիկոլ Փաշինյանին նվիրած գիրքը
Ինչպես հայտնել ենք, ՀՀ վարչապետ Նիկոլ Փաշինյանը Նյու Յորքում հանդիպել է Թուրքիայի նախագահ Ռեջեփ Թայիփ Էրդողանի հետ:
Հանդիպման ժամանակ Էրդողանը Փաշինյանին նվիրել է իր հեղինակած «Ավելի արդար աշխարհ հնարավոր է» գիրքը։
Գրքի նկարագրության մեջ նշվում է, որ հիմնվելով «հինգից մեծ աշխարհի» փիլիսոփայության վրա՝ Ռեջեփ Թայիփ Էրդողանի հեղինակած գրվածքն ուսումնասիրում է ՄԱԿ-ի պարտականությունները՝ ապահովելու կայուն և արդար աշխարհը։
Էրդողանը գրքում ընդգծել է ՄԱԿ-ի Անվտանգության խորհրդի հիմնարար բարեփոխման անհրաժեշտությունը՝ ավելի արդար և կայուն միջազգային կարգ հաստատելու համար՝ վերլուծելով գլոբալ քաղաքականության խնդիրները, որոնք ազդում են մոլորակի ապագայի վրա՝ կոռուպցիա, փախստականներ, խտրականություն, երկակի ստանդարտներ, միջազգային ահաբեկչություն, իսլամաֆոբիա։
Նշվում է, որ գրքում պետության ղեկավարը մանրամասնել է «ողջ մարդկության համար արդարություն ապահովելու Թուրքիայի ջանքերը»։
Գրքի հեղինակը ուշադրություն է հրավիրել ՄԱԿ-ի այնպիսի խնդիրների վրա, ինչպիսիք են օրինականությունը, կարողությունները, արդյունավետությունը, ներառականությունը, ներկայացուցչությունը և կառավարումը:
Թուրքիայի նախագահն ընդգծել է ՄԱԿ-ի Անվտանգության խորհրդի հիմնարար բարեփոխումների անհրաժեշտությունը։
Թուրքական պետության ղեկավարը, խոսելով գրքից, հայտնել է, թե նման աշխատանքի միջոցով ուղերձ է հղում, որ «աշխարհում, որտեղ երեխաներ են մահանում, և որտեղ նրանց սպանում են, անմեղներ չկան»։
Թուրք առաջնորդի խոսքով՝ մի դարաշրջանում, երբ «ողորմությունը կորել է, քաղաքական գործիչները պարտավոր են ապահովել արդարություն և դառնալ խղճի ձայն»:
«Մեր ընկալմամբ՝ արդարությունն է, որ կապահովի աշխարհակարգը, աշխարհի փրկությունն ու երջանկությունը։ Գլոբալ կարգի կարիք կա, որը վստահություն և հույս կհաղորդի ավելի արդար աշխարհի ձևավորման համար»,- տառացիորեն ասվում է գրքում։
Թուրքուվազ Քիթափի հրատարակած և անգլերեն, արաբերեն, գերմաներեն, ֆրանսերեն, ռուսերեն և իսպաներեն լեզուներով թարգմանած գրքի ողջ հասույթը տրամադրվում է Թուրքիայի կառավարության Աղետների կառավարման և ճգնաժամերի վերահսկման մարմնին (AFAD):
Կարծիքներ