ԵՄ-ում հաստատել են կապը Johnson & Johnson-ի պատվաստանյութի կիրառման և թրոմբոզի առաջացման դեպքերի միջև
Դեղամիջոցների հարցով եվրոպական գործակալությունը (ЕМА), գնահատելով Johnson & Johnson ընկերության պատվաստանյութն ստացած անձանց մոտ թրոմբոզի առաջացման վտանգները, հայտարարել է, որ հնարավոր կապ է հայտնաբերել պատվաստման և պատվաստվածների մոտ ծայրահեղ հազվադեպ բարդությունների առաջացման միջև:
Ինչպես փոխանցում է «ՌԻԱ Նովոստի» գործակալությունը, եվրոպական կառույցից հայտնել են, որ այդ պատվաստանյութի առավելությունը կորոնավիրուսի դեմ պայքարում և մահվան ելքերով դեպքերի դեմ զգալիորեն գերազանցում է բարդացումների վտանգը:
«ЕМА-ն հայտնաբերել է կապը պատվաստանյութի ներարկման և թրոմբոզի առաջացման չափազանց հազվադեպ դեպքերի միջև և հաստատում է, որ վտանգ/օգուտ ընդհանուր հարաբերակցությունը դրական է մնում: Թրոմբոզի առաջացման վտանգի մասին տեղեկությունը պետք է ավելացվի արտադրանքի նկարագրությանը»,- ասվում է վերահսկիչ մարմնի հաղորդագրության մեջ:
Հաղորդվում է, որ ЕМА-ի հանձնաժողովն ուսումնասիրել է ԱՄՆ-ում պատվաստված անձանց շրջանում թրոմբոզի հետ կապված բարդացումների 8 դեպք: ԱՄՆ-ում, ընդհանուր առմամբ, ներարկում է ստացել ավելի քան 7 մլն մարդ: Բարդացումներն ի հայտ են եկել մինչև 60 տարեկան անձանց մոտ պատվաստումից հետո երկու շաբաթվա ընթացքում: Նրանց մեծամասնությունը կանայք են:
ԵՄ-ում տվյալ դեղամիջոցով պատվաստումները դեռ չեն սկսվել:
Կարծիքներ