Ռուսական արվեստի թանգարանում կբացվի «Որոնելով գեղեցիկը։ Միխայիլ Վռուբել» ցուցահանդեսը

Ռուսական արվեստի թանգարանում կբացվի «Որոնելով գեղեցիկը։ Միխայիլ Վռուբել» ցուցահանդեսը

 Ռուսական արվեստի թանգարանում (պրոֆ. Ա. Աբրահամյանի հավաքածու) հուլիսի 1-ին տեղի կունենա «Որոնելով գեղեցիկը։ Միխայիլ Վռուբել» ցուցահանդեսի բացման հանդիսավոր արարողությունը։  Առաջին անգամ ՀՀ -ում Ռուսական արվեստի թանգարանում  կներկայացվեն հեղինակի բոլոր աշխատանքները, որոնք առկա են մեր հանրապետությունում։

Թանգարանը ցուցահանդեսը  կազմակերպել է Հայաստանի ազգային պատկերասրահի, ՀՀ Գիտությունների ազգային ակադեմիայի հիմնարար գիտական գրադարանի  հետ  համատեղ և  «Դոմ Մոսկվի» Երևանում մոսկովյան մշակութագործարարական   կենտրոնի աջակցությամբ։

Այն  նվիրվում է ռուս մեծ նկարիչ Միխայիլ Վռուբելի  հոբելյանին, որի  ծննդյան 165- ամյակը նշվեց սույն թվականի մարտի 17-ին, ինչպես նաև Հայաստանի ազգային պատկերասրահի 100- ամյակին։

«Որոնելով գեղեցիկը։ Միխայիլ Վռուբել» ցուցահանդեսին ներկայացված 13 ստեղծագործություններից 9-ը Հայաստանի ազգային պատկերասրահի,  իսկ 4-ը`  Ռուսական արվեստի թանգարանի  ֆոնդերից։ Այդ աշխատանքները  Մ. Վռուբելին ներկայացնում են, որպես   գեղանկարիչ, բեմանկարիչ, գծանկարիչ  և քանդակագործ։

Հանդիսատեսը առաջին անգամ  հնարավորություն կունենա տեսնելու Մ. Լերմոնտովի մահվան 50-ամյա տարելիցի առթիվ հրատարակված  «Երկերի ժողովածուն», որի համար նկարազարդումներ են կատարել 18 լավագույն ռուս նկարիչներ՝ Այվազովսկին, Սուրիկովը, Շիշկինը, Րեպինիը, Վասնեցով եղբայրները, Պոլենովը,  Վռուբելը և այլն։

Ա. Բախրուշինի  անվ. պետական կենտրոնական թատերական  թանգարանի (Մոսկվա) տրամադրած թվային նյութեր ցուցահանդեսը դարձնում են առավել հետաքրքիր և տեղեկատվական։