Հնդկաստանում երկրի պատմության մեջ երբևէ եղած ամենամեծ հումանիտար աղետն է. կորոնավիրուսային իրավիճակը լարված է

Վերջին շրջանում ամբողջ աշխարհի առողջապահական կազմակերպությունների ուշադրությունը սևեռված է Հնդկաստանի վրա, որտեղ կորոնավիրուսային իրավիճակը ծայրաստիճան լարված է: Հնդկաստանում ստեղծված իրավիճակը փորձագետներն անվանում եներկրի պատմության մեջ եղած խոշորագույն հումանիտար աղետը:

Միայն անցած 1 օրվա ընթացքում երկրում հաստատվել է կորոնավիրուսի 332.700 նոր դեպք, մահացել է ավելի քան 2200 մարդ: Նման վիճակագրություն է գրանցվում արդեն մի քանի օր շարունակ: Հիվանդանոցները աշխատում են գերբեռնված վիճակում, արդեն հնարավոր չէ ընդունել բոլոր վարակակիրներին, մարդիկ՝ հիվանդության ծանր դրսևորումներով ժամերով հերթ են պահում ու չեն կարողանում բուժօգնություն ստանալ անգամ առողջապահության առաջնային օղակում, գրանցվել են այդ հիվանդանոցային սպասումների ընթացքում արձանագրված մահերի տասնյակ դեպքեր:

BBC-ն գրում է, որ Դելիի հիվանդանոցներից մեկի բժիշկը հայտնել է, թե ոմանք գալիս են իրենց թթվածնի բալոնով, բայց դա չի օգնում, քանի որ բալոնների օգտագործման համար նախատեսված բոլոր տեղերը զբաղված են: Հենց հիվանդանոցներում էլ թթվածինը խիստ պակաս կա, այն չի բավարարում անգամ հիվանդների թվի նվազագույն պահանջին:

Բժիշկների խոսքով ՝ մարդկանց հնարավորինս մեծ թվի օգնելու համար նրանք ստիպված են դուրս գրել լիարժեք չբուժված հիվանդներին, որոնք ցույց են տալիս միայն վերականգնման առաջին նշանները:

Դեպքերի քանակով Հնդկաստանն աշխարհում երկրորդ տեղում է ԱՄՆ-ից հետո ` 16,2 միլիոն վարակակիրներով, մահացությունների թվով էլ՝ չորրորդը ԱՄՆ-ից, Բրազիլիայից և Մեքսիկայից հետո (գրեթե 187 հազար մարդ): Համաճարակաբանները նշում են, որ այն, ինչ կատարվում է Հնդկաստանում, կարելի է համարել համաճարակի վերջին 1 տարում աշխարհի ցանկացած վայրում ամենասուր իրավիճակը:

Կորոնավիրուսային պատկերը բազմազան է աշխարհի տարբեր հատվածներում:

Վարակը հասել է մինչ Էվերեստ ՝ աշխարհի ամենաբարձր լեռնագագաթը: Լեռը մեկ տարուց ավելի փակ էր լեռնագնացների համար, այժմ լեռնագնացության սեզոնը նոր է բացվել: Ալպինիստներից մեկը՝ նորվեգացի Էրլենդ Նեսը, վեց օր իրեն վատ է զգացել լեռներում գտնվելիս, մինչ ապրիլի 15-ին ուղղաթիռ է կանչվել ՝ նրան տարհանելու համար:

Նրան տեղափոխել են հիվանդանոց, որտեղ ախտորոշել են Covid-19: Հաղորդվում է, որ Նեսն այժմ ապաքինվել է և ընկերների հետ է Նեպալի մայրաքաղաք Կատմանդուում է գտնվում:

Նեսը կարծում է, որ նա կարող էր վարակվել Նեպալյան Հիմալայների Խումբու հովտում գտնվող ավանդական թեյարաններից մեկում: Նրա խոսքով ՝ լեռնագնացներից գրեթե ոչ ոք ՝ ոչ ալպինիստները, ոչ էլ տեղի բնակիչները, դիմակ չեն կրում:

Ավելի ուշ հիվանդությունը հայտնաբերվել է նաեւ Նորվեգիայի խմբին ուղեկցող տեղացի բեռնակիրներից մեկի մոտ ( Էվերեստը բարձրանալու սկզբնական փուլում որոշ լեռնագնացների ուղեկցում են տեղաբնակները):

Նեպալի համար սա ծայրաստիճան անբարենպաստ իրավիճակ է: Երկիրը մեծ կախում ունի Էվերեստ լեռան ալպինիզմի բերող եկամտից (տարեկան մոտ $ 4 միլիոն դոլար), և սեզոնը, չհասցնելով սկսել, վտանգված է:

Եվրոպայում, սակայն, իրավիճակը բացարձակ այլ է:

Հունգարիայի վարչապետ Վիկտոր Օրբանը հայտնել է, որ հաջորդ շաբաթ պատվաստվածների թիվը կհասնի երկրի չափահաս բնակչության 40% -ի: Պատվաստանյութերի քարտեր կրողները կկարողանան ազատորեն այցելել կինոթատրոններ, մարզադահլիճներ, հյուրանոցներ և թատրոններ: Այնուամենայնիվ, երկրում վարակների մակարդակը դեռ բարձր է, և կառավարությունը մտադիր է վերանայել տարրական դպրոցները բացելու ծրագրերը. աշակերտները հաջորդ երկուշաբթի պետք է վերադառնային լրիվ օրով կրթության:

Դանիայի խորհրդարանը հաստատել է գիշերային պարետային ժամի վերացումը և թույլ տվել սրճարանների և ռեստորանների բացօթյա հատվածներում վերադառնալ աշխատանքի: Միեւնույն ժամանակ, երկրում ամենօրյա վարակների վիճակագրությունն այժմ ամենաբարձրն է հունվարից ի վեր: Հինգշաբթի օրը հաղորդվել է 9700 դեպքի 1-օրյա ցուցանիշի մասին: Բայց իշխանությունները նշում են, որ հաջորդ շաբաթվա վերջում Դանիայում պատվաստելու է 5 միլիոն մարդ, այսինքն ՝ գրեթե ամբողջ բնակչությունը:

Ֆրանսիայի վարչապետ Ժան Կաստեքսը կարծում է, որ երկրում անցել է կորոնավիրուսի համաճարակի երրորդ ալիքի պիկը: Անցած 10 օրվա ընթացքում տնտեսության բոլոր ոլորտներում վիճակագրությունը նվազել է միջինը 17% -ով: Մանկապարտեզներն ու տարրական դպրոցները կբացվեն երկուշաբթի օրը, բայց փորձարկման կոշտ մեխանիզմներ կգործի: Ավագ դպրոցի աշակերտները կվերադառնան դպրոցներ մայիսի 3-ին:

Համաճարակի պատճառով Մեծ Բրիտանիայի կառավարությունը երկրորդ համաշխարհային պատերազմից ի վեր ամենամեծ պարտքն է կուտակել: 2020 թվականի մարտից 2021 թվականի մարտ ժամանակահատվածի համար պետական վարկը կազմել է 303,1 միլիարդ ֆունտ ստերլինգ: Սա 250 միլիարդով ավելին է, քան նախորդ ֆինանսական տարվա ցուցանիշը:

Ըստ տնտեսագետների, այս տարբերությունից ավելի քան 200 միլիարդը ծախսվել է համաճարակի կողմից թելադրված լրացուցիչ ծախսերի վրա, մնացածը `հարկերի կրճատման վրա:

Անցնող տարին ստիպել է կառավարությանը բոլոր ջանքերը գործադրել տնտեսությանն օժանդակելու հարցում. Փոքր և միջին բիզնեսի աջակցություն, արտոնությունների և փոխհատուցումների վճարումներ:

Դաունինգ Սթրիթը փող է վերցրել ՝ պետական պարտատոմսեր վաճառելով բանկերին, ֆոնդերին, ներդրումային ընկերություններին և մասնավոր ներդրողներին:

Տնտեսագետները բացատրում են, որ չնայած պարտքերի ահռելի քանակությանը, պարզվել է, որ այն 100 միլիարդով պակաս է, քան կանխատեսվում էր երկու ամիս առաջ: Ենթադրվում էր, որ ֆինանսական տարվա վերջին (Բրիտանիայում սա մարտի վերջն է) գումարը կկազմի 400 միլիարդ ֆունտ ստերլինգ:

Բայց սա փոքր մխիթարանք է՝ ասում են մասնագետները: Միայն որոշ արդյունաբերական ճյուղերի կայուն վերականգնումը կկարողանա օգնել նրանց վերադառնալ նորմալ ֆինանսական վիճակի, և դա հնարավոր կլինի լրացուցիչ հարկերի կրճատումներով, ինչը կրկին փող է պահանջում: