Նորքի այգիների տներից մեկում թմրամիջոցի ջերմոց-սենյակներ և լաբորատորիա է հայտնաբերվել

Ոստիկանության Երևան քաղաքի վարչության քրեական հետախույզները նոյեմբերի 16-ին ստացել էին օպերատիվ տեղեկություն, որ Նորքի այգիների փողոցի տներից մեկում մի խումբ անձինք իրացման նպատակով աճեցնում են թմրանյութեր, ստեղծել են քիմիական թմրանյութերի լաբորատորիա:

Այս մասին հայտնում են ՀՀ ՆԳՆ ոստիկանությունից:

Տեղեկությունն իրացնելու միջոցառմանը մասնակցել են նաև ոստիկանության Մարաշի բաժնի քրեական հետախույզներն ու Երևանի վարչության հատուկ նշանակության գումարտակի ծառայողները: Իրականացվել են նաև քննչական գործողություններ, և նոյեմբերի 17-ին հիշյալ տանը կատարվել է խուզարկություն:

Հայտնաբերվել է պլաստիկ երկու տարա, մեկի մեջ՝ 2, մյուսի մեջ` 6 փաթեթ մարիխուանայի նմանվող զանգված, մեկ զիպ փաթեթ` 12,5 գրամ նույն զանգվածով, կշեռք` բյուրեղանման ու բուսական զանգվածների հետքերով, 264 գրամ կրիստալ թմրանյութի նմանվող զանգվածով երեք փաթեթ, կանեփի նմանվող 218 բույս, նույն բույսի տերևներով մեկ պարկ: Հայտնաբերվել են նաև ուլտրամանուշակագույն լույս արձակող, օդը խոնավեցնող ու չորացնող սարքեր, պարարտանյութեր, մարիխուանայի նմանվող չորացրած զանգվածներ, ընդհանուր` մոտ վեց կիլոգրամ վեց հարյուր գրամ քաշով:

Խուզարկվող տարածքի ուսումնասիրությամբ պարզվել է, որ տան բոլոր սենյակներն օգտագործվել են վերը թվարկածը աճեցնելու և մշակելու նպատակով:

Հետագա միջոցառումներով պարզվել է, որ տունը վարձակալել է 37-ամյա մի տղամարդ, իսկ կանեփն աճեցրել, թմրանյութ պատրաստել ու իրացրել են ինքն ու 36-ամյա մի օտարերկրացի:

Ձեռնարկվում են միջոցառումներ՝ նրանց հայտնաբերելու ուղղությամբ: