Կվերանորոգվեն Ուռուտ և Ագարակ բնակավայրերի համայնքային կենտրոնները

 Լոռի Բերդ խոշորացված համայնքն այս տարի ամենաշատ սուբվենցիոն ծրագրեր ներկայացրած համայնքներից է: Այս մասին հայտնում են Լոռու մարզպետարանից:

Համայնքում այս տարի իրականացվելիք 10 ծրագրերից են «Ուռուտ բնակավայրի համայնքային կենտրոնի արտաքին պատերի ամրացում, ներքին հարդարումը» և «Ագարակի համայնքային կենտրոնի շենքի ճակատային մասի և 1-ին հարկի կապիտալ նորոգումը»:

Աշխատանքների ավարտին կլուծվի բնակիչների ակտիվ հանգստի կազմակերպման խնդիրը, ինչպես նաև հնարավորություն կստեղծվի անցկացնել տարբեր միջոցառումներ` զերծ մնալով ավելորդ ֆինանսական ծախսերից:

«Ուռուտ բնակավայրի համայնքային կենտրոնի արտաքին պատերի ամրացում, ներքին հարդարում» ծրագրի ընդհանուր բյուջեն` նախահաշվային արժեքով, կազմում է շուրջ 12 մլն դրամ, որից 7 մլն դրամը համայնքային ներդրումն է: Այս ծրագրի իրականացման արդյունքում նախատեսվում են շենքի արտաքին պատերի ամրացման և ներքին հարդարման աշխատանքներ:

Ծրագրի շահառու են բնակավայրի բոլոր բնակիչները` շուրջ 1100 մարդ:

«Ագարակի համայնքային կենտրոնի շենքի ճակատային մասի և 1-ին հարկի կապիտալ նորոգում» ծրագրի ընդհանուր բյուջեն` նախահաշվային արժեքով, կազմում է ավելի քան 11 մլն դրամ, որից 7 մլն դրամը` համայնքային ներդրումն է, մնացած մասը կֆինանսավորվի պետբյուջեից:

Ծրագրի իրականացման արդյունքում նախատեսվում են շենքի ճակատային մասի և առաջին հարկի հիմնանորոգման աշխատանքներ:

Ծրագրի շահառու են բնակավայրի բոլոր բնակիչները` շուրջ 1250 մարդ: