«Հայոց ցեղասպանության հատուցման հարցը. սահմանելով ազգային և ﬕջազգային իրավարարության սահմանները»` գիտական թեման հաղթել է

ՀՀ ԿԳՄՍՆ Գիտության կոմիտեի՝ «Հեռավար լաբորատորիաների հիմնադրման ծրագիր» (ARPI) մրցույթի արդյունքում ֆինանսավորվել է նաև Հայոց ցեղասպանության թանգարան-ինստիտուտի ներկայացրած «Հայոց ցեղասպանության հատուցման հարցը. սահմանելով ազգային և ﬕջազգային իրավարարության սահմանները» գիտական թեման:

Այս մասին տեղեկացնում է Հայոց ցեղասպանության թանգարան-ինստիտուտը։

Այն ղեկավարել են Փարիզի Նանտեր համալսարանի միջազգային հանրային իրավունքի պրոֆեսոր Թոմաս Օշմանը և Հայոց ցեղասպանության թանգարան-ինստիտուտի գիտական աշխատանքների գծով փոխտնօրեն պ.գ.թ. Էդիտա Գզոյանը:

Թեման նպատակ ունի ուսումնասիրելու Հայոց ցեղասպանության հատուցման հարցը՝ ինչպես իր պատմական զարգացման, այնպես էլ ներկայումս ազգային, տարածաշրջանային և միջազգային դատարաններում հատուցման գործեր հարուցելու հնարավորությունների համատեքստում։ Այս ուղղությամբ ծրագրում ներգրավված են միջազգային իրավունքի և պատմության արտասահմանյան ու հայաստանյան մասնագետներ, որոնց մասնագիտական ներուժի ներդրմամբ՝ համակողմանիորեն հետազոտվելու և հնարավոր բոլոր ուղիներով առաջարկներ են պատրաստվելու գործնական հիմքերի վրա դնելու Հայոց ցեղասպանության հատուցման հարցը՝ ուսումնասիրելով առկա արխիվային նյութը, կիրառելով միջազգային փորձը և գործի դնելով հնարավոր ձևաչափերը:

Ծրագրի իրականացման արդյունքում Հայոց ցեղասպանության թանգարան-ինստիտուտում երկու տարվա ընթացքում կբացվի գիտական նոր բաժին, որը կզբաղվի Հայոց ցեղասպանության, հետագայում նաև՝ Արցախի հիմնահարցի իրավական ուսումնասիրություններով:

Նման ստորաբաժանման ստեղծման անհրաժեշտությունը վաղուց կարևորված էր, ինչի մասին Հայոց ցեղասպանության թանգարան-ինստիտուտի տնօրենը բարձրաձայնել էր դեռևս 2020 թվականին։

«Լիահույս ենք, որ ծրագրի աստիճանական իրագործումը նոր հորիզոններ կբացի Հայոց ցեղասպանության ճանաչման, դատապարտման և արդար հատուցման անխախտ գործընթացի կազմակերպման ճանապարհին:

Միջազգային հանցագործությունների ճանաչման, դատապարտման և հատուցման բնագավառում այս ծրագրով ստեղծվում է գիտական գլոբալ համագործակցություն, որի արդյունքում հատուցման խնդիրը չի մնա միայն մեր պատմության տիրույթում, այլ նման մասշտաբով և գիտակիրառական ներուժի կենտրոնացմամբ պատմաիրավական ուսումնասիրությունները կնպաստեն ձևավորելու հստակ պահանջներ և արդյունքներ»,-ասված է թանգարանի ֆեյսբուքյան հրապարակման մեջ: