Կրթության տեսչական մարմնում քննարկվել է ՀՀ վարչապետի կողմից տրված հանձնարարականների կատարման ընթացքը

ՀՀ վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Արթուր Ասոյանի նախաձեռնությամբ ՀՀ կրթության տեսչական մարմնում կայացել է աշխատանքային խորհրդակցություն-քննարկում։ Այս մասին հաղորդագրություն է տարածել տեսչական մարմինը:

Խորհրդակցության ընթացքում քննարկվել են ՀՀ վարչապետի կողմից տրված հանձնարարականների կատարման ընթացքը, մասնավորապես՝ հանրակրթական ուսումնական հաստատություններում իրականացվող  «Աջակցություն ուսուցման կազմակերպմանը» ծրագրի իրականացման գործընթացը։

Տեսչական մարմնի ղեկավար Ալեքսանդր Շագաֆյանը, ներկայացնելով ծրագիրը, նշել է, որ  դասալսումներ կիրականացվեն  20 հանրակրթական ուսումնական հաստատություններում։ Մեկնարկը տրվել է մայիսի 2-ից՝ Վանաձորի թիվ 20, 23, 27  և Իջևանի  թիվ 3 և թիվ 4 դպրոցներում։

Դասալսումներին զուգընթաց սովորողներին տրվում են նաև գրավոր աշխատանքներ «Հայոց լեզու» և «Մաթեմատիկա» առարկաներից։ Ակնկալվում է, որ գործընթացի ավարտին դասալսող մասնագետները կներկայացնեն առնվազն 60 եզրակացություն նախատեսված 20 դպրոցների մաթեմատիկայի և հայոց լեզվի ուսուցիչների դասավանդման որակի վերաբերյալ։

Ուշադրության կենտրոնում է նաև մայրենի լեզվի ընթերցանության խնդիրը, որը ծրագրի մյուս բաղկացուցիչն է և իրականացվում է դասալսումների գործընթացին զուգահեռ։

Օրակարգի երկրորդ հարցը վերաբերել է տեսչական մարմնի կողմից 2022 թվականի առաջին եռամսակում կատարված աշխատանքների կատարողականին։ Առաջին եռամսյակի ընթացքում տեսչական մարմնի կողմից իրականացվել են ստուգումներ 2022 թվականի ստուգումների տարեկան ծրագրով նախատեսված 38 հանրակրթական ուսումնական հաստատություններում  (ամփոփվել են դրանցից 31-ի արդյունքները), ստացվել է 7 դիմում-բողոք։ Եռամսյակի արդյունքների ամփոփումը հրապարակված է տեսչական մարմնի պաշտոնական կայքում։  

Խորհրդակցության ընթացքում  պարոն Ասոյանը առանձնահատուկ կարևորել է ՀՀ կառավարության միջոցառումների ծրագրոով նախատեսված՝  «Կրթության բնագավառի պետական վերահսկողության մասին» ՀՀ օրենքի նախագծի ընդունմանը վերաբերող հարցը։

Քննարկվել են նաև հանրակրթական ուսումնական հաստատություններում իրականացվող՝ ռիսկի վրա հիմնված ստուգումների ստուգաթերթերի լրամշակմանը վերաբերող  և կազմակերպչական մի շարք այլ հարցեր։