Երկակի ստանդարտներ ՏՄՊՊՀ-ում (տեսանյութ)

Ջեռուցման կաթսայի գովազդը կռվախնձոր է դարձել երկու ընկերությունների միջև: Նախորդ տարի դեկտեմբերին  «Դոմուս» խանութների ցանցի տնօրենը դիմել էր Տնտեսական մրցակցության պաշտպանության պետական հանձնաժողովին, բողոքելով «Իմեքս գրուպի»՝ նույն ինքը «ԻԴԵԱԼ» խանութների ցանցի անբարեխիղճ գովազդային արշավների դեմ: Երկար տարիներ «ԻԴԵԱԼ»-ը գովազդում է, որ «BAXI» ջեռուցման կաթսաներն ԱՄԵՆԱանվտանգն են:  Մինչդեռ «Դեկորա-Գրուպ» ընկերության կոմերցիոն գծով տնօրեն Մհեր Միրզախանյանը պնդում է, որ աշխարհում չեն արտադրվում այնպիսի կաթսաներ, որոնցից մեկն ամենալավը կարող է լինել: Պատկան կառույցին են դիմել, որ վերջ տան սպառողներին մոլորեցնող  գովազդներին:

Գործը քննության ընդունելուց հետո, «ԻԴԵԱԼ»-ը 2 հակընդդեմ բողոք է ներկայացնում: Դժգոհել են, որ  «Դոմուսի» «ARISTON» ջեռուցման կաթսաների մասին գովազդն էլ պարունակում է իբրև թե անբարեխիղճ մրցակցության տարրեր:

«Մենք չենք ասում, որ մեր ապրանքն ամենալավն է: Մենք ասում ենք, որ մեր ապրանքի՝ այն է  «ARISTON» ապրանքանիշի կաթսայի մեջ կա մի հատ պահեստամաս, որը պրակտիկորեն չի մաշվում»,- ասում է «Դեկորա-Գրուպ»  ընկերության կոմերցիոն գծով տնօրեն Մհեր Միրզախանյանը:

Գործը քննելուց հետո ՏՄՊՊՀ-ն նախազգուշացում է տվել «Իմեքս գրուպին», որ  գովազդից հանի «ամենա» բառը և հետագայում չկիրառի  իրականությանը չհամապատասխանող բառեր, որոնք  ակնհայտ ցույց են տալիս ապրանքի առավելությունը մրցակիցների նկատմամբ: Իսկ «Դեկորա-Գրուպին» էլ տուգանել  է 5 մլն դրամով:

Խնդրի հետքերով գնացել է «Freenews»-ը՝  փորձելով լսել նաև մյուս կողմերին: