Նագելսմանը՝ Բունդեսլիգայում 100 հաղթանակ տարած ամենաերիտասարդ մարզիչ

Գերմանիայի չեմպիոն Մյունխենի «Բավարիայի» գլխավոր մարզիչ Յուլիան Նագելսմանը դարձավ Բունդեսլիգայում 100 հաղթանակ տարած ամենաերիտասարդ մարզիչը։

Գերմանիայի առաջնության 15-րդ տուրում «Բավարիան» Մյունխենի «Ալյանց Արենա» ստադիոնում 2։1 հաշվով առավելության հասավ «Մայնցի» նկատմամբ։

Նագելսմանը այդ ցուցանիշին հասավ 34 տարեկան, 141 օրականում՝ գերազանցելով գերմանացի Էրիխ Ռիբեկի ռեկորդը՝ 38 տարեկան, 147 օրական, հաղորդում է Opta-ն։

Էրիխ Ռիբեկը, 1968-ին 31 տարեկանում գլխավորելով Ֆրանկֆուրտի «Այնտրախտը», դարձել էր նաեւ Գերմանիայի առաջնության պատմության մեջ ամենաերիտասարդ գլխավոր մարզիչը։

Հիշեցնենք, որ Յուլիան Նագելսմանն այս տարի է գլխավորել «Բավարիան»՝ փոխարինելով Գերմանիայի հավաքական տեղափոխված Հանս-Դիտեր Ֆլիկին։ Նագելսմանը եղել է նաեւ «Հոֆենհայմի» եւ «ՌԲ Լայպցիգի» գլխավոր մարզիչը։

«Բավարիան» Բունդեսլիգայի 15 տուրից հետո 37 միավորով գլխավորում է մրցաշարային աղյուսակը։