ԿԳՄՍ նախարարի տեղակալ Ալֆրեդ Քոչարյանը մասնակցել է Զորավար Անդրանիկի 160-ամյակին նվիրված ցուցադրությանը

ԿԳՄՍ նախարարի տեղակալ Ալֆրեդ Քոչարյանը մասնակցել է Հայաստանի պատմության թանգարանում Զորավար Անդրանիկի 160-ամյակին ընդառաջ անցկացվող «Սուրբ անունդ պիտի հիշվի դարեդար» խորագիրը կրող ժամանակավոր ցուցադրության բացման արարողությունը։

Բացման արարողությանը ներկա են եղել նաև ՊՆ քարտուղարության պետ Սերոբ Հունանյանը և այլ հյուրեր։

Հայաստանի պատմության թանգարանի տնօրեն Դավիթ Պողոսյանը բացման խոսքում ընդգծել է ցուցադրության կարևորությունը և շնորհակալություն հայտնել Անդրանիկի կնոջ ժառանգներ Գրիգոր և Սեդա Տիգրանյաններին՝ Զորավարի անձնական իրերը թանգարանին նվիրաբերելու համար։

Ցուցադրության բացումն ազդարարվել է Զորավարի կնոջ ժառանգների կողմից նրա մազափնջի նվիրաբերման արարողությամբ։

Ցուցադրության շրջանակում ներկայացված են Զորավարի մարտական թուրը, ընտանեկան լուսանկարներ և փաստաթղթեր, անձնական իրեր։

Միջոցառմանը երաժշտական կատարմամբ հանդես են եկել Շառլ Ազնավուրի անվան մշակույթի և արվեստի պետական քոլեջի սաները։