Քննարկել է ՎԶԵԲ 2025-2030 թթ․ Հայաստանի ռազմավարությունը
ՀՀ ֆինանսների նախարար Վահե Հովհաննիսյանն ընդունել է Վերակառուցման և զարգացման եվրոպական բանկի ենթակառուցվածքների հարցերով պատվիրակությանը, որի կազմում էին Կովկասի տարածաշրջանի ղեկավար Ալկիս Դրակինոսը, ենթակառուցվածքների գծով տարածաշրջանային ղեկավար Ելենա Գոդեևան, ինչպես նաև ՎԶԵԲ հայաստանյան գրասենյակի ղեկավար Ջորջ Ախալկացին:
Հանդիպման շրջանակներում կողմերը քննարկել է ՎԶԵԲ 2025-2030 թվականների Հայաստանի ռազմավարությունը, ինչպես նաև Բանկի ռազմավարական առաջնահերթությունները: Համաձայն սահմանված առաջնահերթությունների՝ բանկը մտադիր է կենտրոնանալ Հայաստանի տնտեսական դիվերսիֆիկացիայի ամրապնդման վրա` աջակցելով բարձր ներուժ ունեցող ոլորտների ընկերություններին, միաժամանակ աշխատելով բարելավել առևտրային ուղիները և լոգիստիկ ենթակառուցվածքները արդյունավետ տնտեսական փոխգործակցություններ ապահովելու համար: Բանկը նպատակ ունի նպաստել դեկարբոնիզացմանը և էներգաարդյունավետության բարձրացմանը՝ միաժամանակ աջակցելով Հայաստանի քաղաքներին՝ հաղթահարելու իրենց ամենահրատապ բնապահպանական մարտահրավերները կայուն ենթակառուցվածքների միջոցով
:Նախարարը նշել է, որ Հայաստանը 2024թ. մայիսի 14-16-ը ՎԶԵԲ ամենամյա կարևորագույն միջոցառումը Երևանում հյուրընկալելուց հետո մեծ ոգևորությամբ է սպասում այս տարի Լոնդոնում կայանալիք տարեկան հանդիպմանը: ՎԶԵԲ-ը տասնամյակներ շարունակ Հայաստանի հուսալի գործընկերներից է, և ներկայումս համագործակցությունն ավելի ակտիվ է և ընդլայնված:
Ամփոփելով հանդիպումը՝ նախարարը պատրաստակամություն է հայտնել ապագայում ևս պահպանել և էլ ավելի զարգացնել երկկողմ համագործակցության արդեն իսկ բարձր մակարդակը:
Կարծիքներ