Գյումրիի «Մայր Հայաստան» հուշահամալիրը վերանորոգվում է կառավարության աջակցությամբ

ՀՀ կառավարության հետ համատեղ սուբվենցիոն ծրագրի շրջանակներում Գյումրիում   շարունակվում են «Մայր Հայաստան» հուշահամալիրի սանդղաջրվեժի վերանորոգման և տարածքի բարեկարգման շինաշխատանքները: Շինարարության մեկնարկը տրվել է անցած տարվա սեպտեմբեր ամսին,  freenews.am- ի հետ զրույցում փաստեց Գյումրի համայնքի բնակկոմունալ  և շրջակա միջավայրի պահպանության  բաժնի պետ Կնյազ Մանասյանը: Նրա հավաստմամբ՝ աշխատանքների արդյունքում ի հայտ են եկել նաև այլ խնդիրներ, որոնց արդյունքում ծրագրում  կատրվել է վերահաշվարկ, մոտավորապես  7-8  մլն դրամ դարձյալ ներդրվեց համայնքի բյուջեից շինաշխատանքներն ավարտուն տեսքի բերելու համար: Կառուցապատող ընկերությունը, ըստ պաշտոնյայի, խոստացել է այս տարվա օգոստոսի մեկին ավարտին հասցնել  շինարարական աշխատանքները: Ըստ Կնյազ Մանասյանի՝ այս աշխատանքների իրականացմանը համայնքը երկար տարիներ էր սպասել, քանի որ քաղաքի այցեքարտերից մեկն համարվող այս հուշահամալիրը մեծ վնասներ էր կրել ավերիչ երկրաշարժի ժամանակ և մինչ օրս կապիտալ ոչ մի շինաշխատանք չէր իրականացվել: Իսկ այժմ փոխվել են տարածքի բազալտե քարերը, հուշարձանի պատվանդանի հարակից սալաքարերը, տեղադրվել է անհայտ զինվորի հուշարձանի աստղը, և այլն: Շինաշխատանքների համար նախատեսված  51  միլիոն դրամ գումարից  կառավարությունը սուբվենցիոն ծրագրի շրջանակներում տրամադրել է արժեքի  55 %-ը, իսկ 45%-ը  հատկացվել է  համայնքի բյուջեից: Վերջերս  Շիրակի մարզպետ Տիգրան Պետրոսյանը, Գյումրի համայնքի ղեկավար Սամվել Բալասանյանը  եղել են «Մայր Հայաստան» հուշահամալիրի տարածքում, հետևել շինարարական աշխատանքների ընթացքին: Հիշեցնենք   Գյումրիի «Մայր  Հայաստան»  հուշահամալիրը կառուցվել է 1975 թ.  Հայրենական մեծ պատերազմի 30-ամյակի առթիվ: Հուշարձանի հեղինակներն են  ԽՍՀՄ  ժողովրդական նկարիչ, քանդակագործ Արա Սարգսյանն ու վաստակավոր ճարտարապետ Ռաֆայել Եղոյանը: