Կառավարությունը հաստատեց անասնաբուծության ճյուղում իրականացվող ներդրումային ծրագրերին աջակցության տրամադրման փորձնական ծրագիրը

Նախատեսվում է բոլոր մարզերում անասնաբուծության ճյուղում ներդրումային ծրագրերի շրջանակում տնտեսվարողներին տրամադրել առավելագույնը 5 փուլով փոխհատուցում, ընդ որում՝ 1 շահառուին տրամադրվող փոխհատուցումը առավելագույնը կկազմի ընդամենը կատարված ներդրումների 35%-ը, բայց ոչ ավելի, քան 3,5 մլրդ դրամը, իսկ միայն թռչնաբուծության ուղղությամբ ոչ ավելի, քան 2,8 մլրդ դրամը։

ՀՀ էկոնոմիկայի նախարար Վահան Քերոբյանը նշեց, որ էկոնոմիկայի նախարարությունն անընդհատ աշխատում է գյուղատնտեսական արտադրողականությունը բարձրացնելու և գյուղատնտեսությունն ավելի եկամտաբեր դարձնելու ուղղությամբ, և այդ ուղղությամբ մեր հիմնական ճանապարհը գյուղատնտեսության խոշորացումն է:

«Մենք անցած տարի բարձրացրեցինք ինտենսիվ այգիների սահմանաչափը և հիմա առաջ ենք բերել մի նոր փորձնական ծրագիր, որով խթանելու ենք խոշոր գյուղատնտեսական ծրագրերն անասնաբուծության, մասնավորապես, տավարաբուծության, խոզաբուծության և թռչնաբուծության ոլորտներում, որովհետև այս երեք ուղղություններով էլ մեր ինքնաբավության մակարդակը բավականին ցածր է, և մենք կարիք ունենք ինչքան հնարավոր է արագ խոշոր գյուղատնտեսական համալիրներ ձևավորել: Նախագծով առաջարկում ենք խոշոր ներդրումային ծրագրերի ներքո արված կապիտալ ծախսերի մինչև 35 տոկոսը փոխհատուցել 5 տարվա ընթացքում, որը կվերահսկվի «Մեծ քառյակի» (Big Four) աուդիտորական ընկերությունների կողմից, որը նաև կերաշխավորի այս ծրագրերի իրագործման արդյունավետությունը, արդյունքում մենք պլանավորում ենք, որ գյուղատնտեսության արտադրողականությունն ընդհանուր առմամբ էապես կբարելավվի, և մենք կունենանք խոշոր գյուղատնտեսական համալիրներ, որոնք կապահովեն նաև բավարար չափով պարեն մեր պարենային անվտանգության համար»,- ասաց էկոնոմիկայի նախարարը:

«Մենք գյուղատնտեսական ծրագրերի մասին ենք ասում, ես կարծում եմ՝ այս թեմաներով մեր մարզպետարաններն ավելի ակտիվ պետք է զբաղվեն,- նշեց ՀՀ վարչապետ Նիկոլ Փաշինյանը,- «Ամեն գյուղացի և ամեն պոտենցիալ ներդրող պետք է տեղյակ լինի»:

«Մենք այստեղ դիտարկում ենք իսկապես գերխոշոր ծրագրերը՝ 10 միլիարդից ոչ պակաս ծրագրերը՝ և՛ տավարաբուծության, և՛ խոզաբուծության ոլորտում, իսկ թռչնաբուծության ուղղությամբ՝ 8 մլրդ և ավելի: Կարծում ենք, որ շուկան պատրաստ է նաև դրան, մենք կգտնենք այդ ներդրողներին, որոնք այդ ներդրումը կանեն»,- ասաց Քերոբյանը: