Չորրորդ աստիճանի վթարային շենքերը չեն կարող ծառայել որպես բնակելի կառույցներ, կիրականացվի վերաբնակեցման նախագիծ․ Ավինյան
Երևանի փոխքաղաքապետ Տիգրան Ավինյանն այսօր աշխատանքային առաջին այցով եղել է Աջափնյակ վարչական շրջանում գտնվող չորրորդ աստիճանի վթարային շենքերում։
Ֆեյսբուքյան իր էջում Ավինյանը գրել է․
«Ապահով և անվտանգ բնակարաններում ապրելը մեր բոլորի իրավունքն է, իսկ դրա ապահովումը մեր հանձնառությունն է: Աջափնյակ վարչական շրջանում գտնվող չորրորդ աստիճանի վթարային շենքերում ապրելը ապահով և անվտանգ չէ. նմանօրինակ շենքերը չեն կարող ծառայել որպես բնակելի կառույցներ:
Ուստի՝ բնակիչների, քաղաքապետարանի և կառուցապատողի միասնական ջանքերի շնորհիվ իրականացվելու է վերաբնակեցման նախագիծ:
Շրջայցի ընթացքում ծանոթացանք վթարային շենքերի բնակարանային վիճակին և բնակիչների հետ քննարկեցինք հնարավոր լուծումների շրջանակը: Նմանատիպ այցերն ու բնակիչների հետ զրույցները շարունակական բնույթ են ունենալու:
Ապահովության և անվտանգության բաղադրիչ է նաև ապաստարանների անխափան շահագործումը: Ուզում եմ տեղեկացնել, որ ապաստարանների մաքրման աշխատանքները սկսված են և մոտակա ժամանակներում կհացվեն ավարտին»:
Կարծիքներ