Արցախում փոփոխություններ են սահմանվել միջազգային պայմանագրերի կնքման ընթացակարգերում

Արցախում փոփոխություններ են սահմանվել միջազգային պայմանագրերի կնքման ընթացակարգերում

 Արցախի Ազգային ժողովի արտահերթ նիստում միաձայն ընդունված նոր օրենքով առավել խիստ պահանջներ են սահմանվել միջազգային պայմանագրերի նախագծերի իրավապայմանագրային և կատարման փուլերի ընթացակարգերի համար: Այս մասին նշել է Արցախի արտաքին գործերի նախարար Դավիթ Բաբայանը՝ խորհրդարանի քննարկմանը ներկայացնելով «Միջազգային պայմանագրերի մասին» օրենքի նախագիծը՝ կից օրենքների նախագծերի փաթեթով:

«Օրինագծի անհրաժեշտությունը պայմանավորված է նախևառաջ նրանով, որ յուրաքանչյուր միջազգային պայմանագիր, որը պետք է կնքի Արցախի Հանրապետությունը, կարգավորվի օրենսդրությամբ: Սա կարևոր է հատկապես ներկայումս, երբ ամեն ինչ պետք է արվի Արցախի Հանրապետության սուբյեկտայնությունը պահպանելու համար: Ես կողմնակից եմ, որպեսզի արտաքին քաղաքականության հարցերում սերտորեն համագործակցենք օրենսդիր իշխանության հետ»,-պարզաբանեց Բաբայանը:

Արտգործնախարարի խոսքով, միջազգային պայմանագրերի վերաբերյալ նոր օրենքի ընդունման հիմքում՝ միջազգային հարաբերությունների ոլորտում պետական գործառույթների գործող ընթացակարգերի վերանայման անհրաժեշտությունն է, ինչը պայմանավորված է Արցախի Սահմանադրության բարեփոխման արդյունքով:

«Օրինագծով նախատեսված է սկզբունքային փոփոխություններ՝ նախ  միջազգային պայմանագրի նախագծի վերաբերյալ կառավարության որոշման ընդունվելու է միայն գերատեսչությունների կողմից վերջնական լրամշակված, և պայմանագրի մյուս կողմի հետ փոխհամաձայնեցված տեքստի առկայության դեպքում: Պայմանագրի կնքման հարցում բարձրանալու է իրավասու գերատեսչության դերն ու  պատասխանատվությունը: Ազգային ժողովի կողմից միջազգային պայմանագրի վավերացումը, կասեցումը և չեղյալ հայտարարումն իրականացվելու է համապատասխան օրենք ընդունելու միջոցով: Դրանով պայմանավորված՝ միջազգային պայմանագրի նախագծի իրավապայմանագրային և կատարման փուլերի ընթացակարգերի համար սահմանվելու են առավել խիստ պահանջներ: Ըստ առաջարկվող օրինագծի միջազգային պայմանագրերը չեն դասակարգվում՝ միջպետական, միջկառավարական, միջգերատեսչական, ելնելով այն հանգամանքից, որ միջազգային իրավունքում որպես միջազգային պայմանագրի սուբյեկտ հանդես է գալիս Արցախի Հանրապետությունը: Դյուրացված կարգ է սահմանվում վարկային ու դրամաշնորհային պայմանագրերի ուժի մեջ մտնելու համար»,-մանրամասնել է Դավիթ Բաբայանը:

Արցախի Հանրապետության «Միջազգային պայմանագրերի մասին» օրենքի նախագիծն Ազգային ժողովն ընդունել է միաձայն քվեարկությամբ:

Հետևեք մեզ նաև Տելեգրամում