Օրենսդրական նախաձեռնությամբ ԱԱԾ տնօրենին և տեղակալներին պաշտոնի կնշանակի ու կազատի վարչապետը

«Պետական կառավարման համակարգի մարմինների մասին» օրենքի 5-րդ հոդվածի 2-րդ մասի 1-ին կետի համաձայն` Ազգային անվտանգության ծառայությունը ՀՀ վարչապետին ենթակա մարմին է, մինչդեռ ծառայության տնօրենը եւ տնօրենի տեղակալները ներկայիս կարգավորումների համաձայն` պաշտոնի նշանակվում եւ պաշտոնից ազատվում են Հանրապետության նախագահի կողմից: Անհրաժեշտ է վերանայել գործող կարգավորումներն այնպես, որ նշված անձանց պաշտոնի նշանակի եւ պաշտոնից ազատի վարչապետը:

Ասել է ՀՀ արդարադատության նախարարի տեղակալ Արմենուհի Հարությունյանը` ԱԺ պաշտպանության եւ անվտանգության հարցերի մշտական հանձնաժողովի` դեկտեմբերի 20-ի արտահերթ նիստում առաջին ընթերցմամբ քննարկման ներկայացնելով ««Ազգային անվտանգության մարմիններում ծառայության մասին» օրենքում փոփոխություններ կատարելու մասին» եւ կից նախագծերի փաթեթը:

Ըստ նրա` այդպիսով կապահովվի «Հանրային ծառայության մասին» օրենքի 6-րդ հոդվածով նախատեսված պետական վարչական պաշտոններ զբաղեցնող անձանց ինչպես նշանակման եւ ազատման կարգի, այնպես էլ կարգավիճակի համապատասխանությունը հանրային ծառայության ընդհանուր տրամաբանությանը:

Նշվել է, որ նախատեսվող փոփոխությունների ընդունումից հետո ԱԱԾ տնօրենը եւ տեղակալները հանդիսանալու են հանրային պաշտոն զբաղեցնող անձինք, իսկ ազգային անվտանգության մյուս ծառայողները` զինվորական պաշտոններ զբաղեցնող անձինք: Ազգային անվտանգության ծառայության առաքելության, գործառույթների եւ նպատակների պատշաճ կյանքի կոչումն ապահովելու համար անհրաժեշտ է հստակեցնել նաեւ ԱԱԾ տնօրենի կողմից զինվորական ծառայության պաշտոն զբաղեցնող անձանց նկատմամբ կարգապահական իրավունքների կիրառման հնարավորությունը` համապատասխան լրացում կատարելով «ՀՀ զինված ուժերի կարգապահական կանոնագիրք» օրենքում:

ՀՀ արդարադատության նախարարի տեղակալը պատասխանել է նաեւ պատգամավորների հարցերին:

ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը հետաքրքրվել է` արդյո՞ք նմանօրինակ փոփոխություններ կլինեն նաեւ վարչապետին ենթակա մյուս կառույցներում:

Ի պատասխան նշվել է, որ առաջիկայում ամենայն հավանականությամբ կկատարվեն այդպիսի փոփոխություններ, քանի որ դա օրենքի պահանջ է:

Անդրադառնալով նախագծերի փաթեթի ընդունման հրատապությանը` Արմենուհի Հարությունյանը փաստել է, որ փոփոխությունների փաթեթի ընդունումը տարբեր պատճառներով քանիցս հետաձգվել է, եւ այս կարգավորումներն օրենսդրական անհրաժեշտություն են: