Թուրքիան հայտարարել է Հյուսիսային Իրաքում վեց զինյալների չեզոքացման մասին

Թուրքիայի ազգային պաշտպանության նախարարությունը հայտնել է, որ Հյուսիսային Իրաքում քրդական զինված կազմավորումների վեց զինյալներ չեզոքացվել են։ Այս մասին գրում է «Հայկական ժամանակը»։

«Ահաբեկչության և ահաբեկիչների դեմ մեր պայքարը շարունակվում է արդյունավետ և վճռականորեն: Հյուսիսային Իրաքում հայտնաբերված  6 ահաբեկիչները վնասազերծվել են», - ասվում է նախարարության Twitter-ում տեղադրված հաղորդագրության մեջ:

Քրդական կազմավորումների հետ զինված հակամարտությունը Թուրքիայում սկսվել է 1984 թվականին և թեժացել 2015 թվականին։ Հյուսիսային Իրաքում կան քրդական  բազաներ, որոնց դեմ Թուրքիայի զինված ուժերը օդային և ցամաքային գործողություններ են իրականացնում։

Թուրքիայի նախագահ Թայիփ Էրդողանն ավելի վաղ հայտարարել էր, որ 2015 թվականի հուլիսից ի վեր քրդական կազմավորումների  6 հազար անդամ ոչնչացվել է, իսկ Իրաքից դուրս՝ 6,9 հազարը, թուրքական անվտանգության ուժերի կորուստները կազմել են ավելի քան 1,2 հազար մարդ։