Բրուքլինում դեռահասների երեկույթի ժամանակ հրաձգություն է տեղի ունեցել. կա 1 զոհ և 6 տուժած

ԱՄՆ Նյու Յորք քաղաքի Բրուքլին թաղամասում երեկույթի ժամանակ տեղի ունեցած հրաձգության հետևանքով վեց դեռահաս հրազենային վնասվածք է ստացել, ևս մեկը մահացել է։ Այս մասին հաղորդում է CNN հեռուստաալիքը՝ ոստիկանությանը հղումով։

Իրավապահ մարմինների տվյալներով՝ միջադեպը տեղի է ունեցել կիրակի երեկոյան դեռահասներից մեկի 16-ամյակի առթիվ կազմակերպված երեկույթի ժամանակ։ Դեպքի վայր ժամանած ոստիկանները հաղորդել են յոթ տուժածի մասին։
Նյու Յորքի ոստիկանության ղեկավարի օգնական Ջուդիտ Հարիսոնի խոսքով՝ տուժածները 14-20 տարեկան են, նրանց բոլորին տեղափոխել են տեղի հիվանդանոցներ։ Ավելի ուշ տուժածներից մեկը՝ 20-ամյա մի աղջիկ, մահացել է։

Հաղորդվում է, որ կրակ բացած անձինք կարող էին մի քանիսը լինել։ Կասկածյալների ձերբակալման մասին ոչինչ չի հաղորդվել։