Փորլուծություն կորոնավիրուսի ժամանակ. ինչ անել

Վիճակագրության համաձայն՝ կորոնավիրուսով վարակվածների 5-18 տոկոսի մոտ աղեստամոքսային խնդիրներ են ի հայտ գալիս: Կորոնավիրուսի տարածված նշաններից մեկը, ի թիվս հազի, կոկորդի ցավի, փորլուծությունն է: Ընդ որում՝ հաճախ փորլուծությունը կարող է դառնալ այս վարակի միակ ախտանշանը:

Հայտնվելով օրգանիզմում՝ մասնավորապես՝ աղեստամոքսային համակարգի օրգաններում, կորոնավիրուսը սկսում է բազմանալ լորձաթաղանթի վրա՝ քայքայելով այն: Այդ ժամանակ ակտիվանում է իմունային մեխանիզմը՝ պայքարելով վիրուսի դեմ եւ առաջացնելով այնպիսի նշաններ, ինչպիսիք են սրտխառնոցը, որովայնում ցավերը, փորլուծությունը:

Փորլուծությունով կարող է ուղեկցվել թե ծանր ընթացով կորոնավիրուսը, թե թեթեւ:

Սովորաբար կորոնավիրուսի ժամանակ նկատվում է հետեւյալ պատկերը՝

Օրական 4-6 անգամ հաճախականություն..

Առանց արյան՝ ավելի լորձային մասսա..

Որովայնի հատվածում առանց չափազանց սուր ցավերի..

Փորլուծությունն ինքնին վտանգավոր է նրանով, որ կարող է օրգանիզմի ջրազրկման հանգեցնել: Իսկ COVID-19-ի դեպքում քանի որ սովորաբար հիվանդը բարձր ջերմություն է ունենում, ինչը եւս օրգանիզմը ջրազրկում է, փորլուծությունը կարող է առավել կրկնապատկել ջրազրկման վտանգը:

Ջրազրկման հետեւանքով օրգանիզմում առաջանում են հետեւյալ վտանգները՝

Սրտանոթային համակարգի աշխատանքի խախտում

Արյան շրջանառության վատացում

Երիկամների աշխատանքների խաթարում:

Կորոնավիրուսի ժամանակ անհրաժեշտ է շատ հեղուկ խմել, քանի որ հեղուկը նպաստում է օրգանիզմից վարակի ավելի արագ հեռացմանը:

Իսկ եթե կորոնավիրուսն ուղեկցվում է փորլուծությամբ, դիմեք բժշկի: Բացի դա, շատ հեղուկ օգտագործեք, թեյեր: Խմեք հաճախ, քիչ-քիչ, մի քանի կումերով:

Կարող եք բժշկի նշանակման հատուկ թուրմեր օգտագործել, խուսափեք այնպիսի սննդից, որոնք կարող են գրգռել աղիները, նպաստել փորլուծությանը: