Լուկաշենկոն սպառնացել է «վայրկյանական պատասխան հարված» հասցնել լրատվամիջոցներին, եթե վերջիններս երկիրն ապակայունացնելու փորձեր անեն

Բելառուսի նախագահ Ալեքսանդր Լուկաշենկոն լրատվամիջոցներին սպառնացել է «վայրկյանական հարված» հասցնել, եթե վերջիններս երկիրն ապակայունացնելու փորձեր անեն, հայտնում է «ՌԻԱ Նովոստի» գործակալությունը։

«Եթե երկրի դեմ պայքարեք, փորձեք երկիրը քաոսի վերածել ու ապակայունացնել այն, ապա վայրկյանական պատասխան կստանաք»,- այսօր հայտարարել է Լուկաշենկոն։

Հիշեցնենք, որ Բելառուսում այսօր նախագահական ընտրությունների անցկացման հիմնական օրն է։ երկրի գործող նախագահն, իր հերթին, արդեն հասցրել է ընտրատեղամաս ժամանել և կատարել իր ընտրությունը։

Բելառուսի առաջնորդը նախ ջերմ շփում է ունեցել ընտրական հանձնաժողովի ղեկավարի, հանձնաժողվի անդամների և դիտորդների հետ։ Այնուհետև անձնագիրը ներկայացնելու հետո նա ստացել է ընտրաթերթիկն ու անցել խցիկի մյուս կողմ՝ քվեարկելու համար։

Ինչպես ավելի վաղ հայտնել էր Tert.am-ը, Բելառուսում այսօր 08։00-ից բացվել է 5 767 ընտրական տեղամաս, որից 44-ը՝ արտասահմանում, որոնք աշխատելու են 36 երկրի բելառուսական դեսպանատներում և հյուպատոսություններում։

Պետական բարձրագույն այս պաշտոնի համար իր թեկնածությունն է առաջադրել հինգ քաղաքական գործիչ, որոնց թվում է նաև երկիրը 26 տարի ղեկավարած Ալեքսանդր Լուկաշենկոն, որի համար սա արդեն 6-րդ նախագահական ընտրությունն է։

Աղբյուրը մանրամասնում է, որ ընտրությանը մասնակցելու իրավունք ունի Բելառուսի 6․8 միլիոն քաղաքացի։ Նշվում է, որ ընտրությունները կայացած կհամարվեն, եթե ցուցակագրված քաղաքացիների 50 տոկոսը օգտվի ընտրելու իր իրավունքից։