Ֆրանսիացի բժիշկների երկրորդ խումբն է եկել Հայաստան
Երեկ Մարսել-Երևան հատուկ չվերթով Ֆրանսիայից Հայաստան են ժամանել բժիշկների երկրորդ խումբը: 9 բուժաշխատող միացել են կորոնավիրուսի դեմ պայքարին:
Այդ մասին FreeNews-ին հայտնեցին ՀՀ սփյուռքի գործերի գլխավոր հանձնակատարի գրասենյակի տեղեկատվության և հասարակայնության հետ կապերի վարչությունից։
Բժիշկների խմբի ղեկավարն է հանրահայտ ֆրանսահայ բժիշկ Լորան Փափազյանը: Հայտնի բժիշկ ռեանիմատոլոգ Հայկ Վարդանյանը ևս նրանց թվում է։
Սփյուռքի գործերի գլխավոր հանձնակատարի գրասենյակն այս նախաձեռնությունը կյանքի է կոչվել Առողջապահության նախարարության և Հայաստանում Ֆրանսիայի Հանրապետության դեսպանության հետ համագործակցությամբ: Ֆրանսիացի բժիշկները կորոնավիրուսով վարակված հիվանդներին բուժօգնություն կցուցաբերեն «Սուրբ Գրիգոր Լուսավորիչ» հիվանդանոցում և Վնասվածքաբանության և օրթոպեդիայի գիտական կենտրոնում:
Այսօր ֆրանսիացի բժիշկների առաջին խումբը մեկնել է։ 10 օր շարունակ ֆրանսիացի 10 բժիշկ այստեղ պայքարել է համավարակի դեմ։
Կորոնավիրուսի դեմ պայքարում Հայաստանին օգնում են բժիշկներ բարեկամ երկրներից։
Մոսկվա-Երևան հատուկ չարտերային չվերթով էլ կիրակի օրը Հայաստան է ժամանել ռուսաստանցի բժիշկների 5-հոգանոց առաջին խումբը: Չվերթով մեր երկիր են տեղափոխվել Առողջապահության նախարարությանը նվիրաբերված բժշկական սարքավորումներ և անձնական պաշտպանիչ պարագաների խմբաքանակ:
Ի դեպ, հավելենք, որ վարչապետ Նիկոլ Փաշինյանը ֆեյսբուքյան իր էջում տեղեկացրել էր, որ Չինաստանից գնել են 500 թթվածնային խտացուցիչներ, որոնք բաշխվելու են կորոնավիրուսային հիվանդությամբ հաստատված և կասկածելի դեպքերով զբաղվող բուժհաստատություններին:
Չինաստանից մատակարարվել է նաև երեք մեծ թթվածին արտադրող կայան, որոնք մեծացնելու են մի քանի բժշկական կենտրոնների կենտրոնացված թթվածին արտադրելու հզորությունները:
Կարծիքներ