Արցախի Հադրութի շրջանի մի շարք համայնքներում վերացվել են ժամանակավոր սահմանափակումները

 Արցախի Հանրապետության Հադրութի շրջանի մի շարք համայնքներում վերացվել են կորոնավիրուսի համավարակի պատճառով մտցված ժամանակավոր սահմանափակումները: Այս մասին նշված է Հանրապետության պարետի որոշման մեջ:

Արցախի պարետի որոշմամբ՝ ուժը կորցրած են ճանաչվել Հադրութի շրջանի Հարթաշեն, Քյուրաթաղ, Ակնաղբյուր, Ուխտաձոր, Տող, Տումի և Մոխրենես համայնքներում մտցված ժամանակավոր սահմանափակումները:

Արցախում հունիսի 27-ի դրույթամբ՝ առկա է կորոնավիրուսային հիվանդության ընդհանուր 115 դեպք, որոնցից 87-ը՝ առողջացած: Մեկուսացված է 52 քաղաքացի, թեստավորումների քանակը 1904 է: Արցախում կորոնավիրուսից մահվան դեպքեր չեն արձանագրվել:

Արցախի Հանրապետությունում 2020 թվականի ապրիլի 12-ին հայտարարված և մինչև հունիսի 11-ը երկարաձգված արտակարգ իրավիճակի ժամկետը երկարաձգվել է 30 օրով` 2020 թվականի հունիսի 11-ից, ժամը 22:00-ից մինչև 2020 թվականի հուլիսի 11-ը, ժամը 22:00-ը ներառյալ։