Բեզոարյան այծերի անակնկալ հյուրը. Ուշագրավ տեսարան՝ Հայաստանի վայրի բնությունից. (տեսանյութ)

Վայրի բնության շարժը դիտարկելիս մշտապես կարելի է տարբեր ուշագրավ տեսարանների ականատեսը դառնալ, որոնցից մեկը, օրինակ, այս տեսանյութն է, որտեղ մեկ կադրում են հայտնվել գիշատիչն ու ոչ գիշատիչը։ Կովկասյան կենսաբազմազանության ապաստարանի (CWR) անտառապահ Խորեն Ղազարյանը բեզորայան այծերի խումբ դիտարկելիս հետաքրքիր դրվագ է տեսանկարահանել․ անհանգիստ այծերը ժայռի գագաթից «զարմացած» նայում են, թե ո՞վ է իրենց հանգիստը խանգարել, և այդ պահին կադրում հայտնվում է արջի քոթոթը։ Այս տեսարանն ամբողջությամբ ցուցադրում է, թե որքան գրավիչ և անակնկալներով հարուստ է վայրի բնությունը։

Թե՛ բեզոարյան այծը (Capra aegagrus), թե՛ գորշ արջը (Ursus arctos) ՀՀ կենդանիների Կարմիր գրքում գրանցված տեսակներ են և ունեն հատուկ պահպանության կարիք։ ԿԳ տվյալների համաձայն՝ որսագողությունը, հողերի յուրացումը, լեռնային արդյունաբերության զարգացումը, բիոտոպերի քայքայումը, անասունների արածեցումը, ինչպես նաև մարդու կողմից անհանգստություն պատճառելը բեզոարյան այծերի և գորշ արջերի վտանգման հիմնական գործոններն են:

Շուրջ 30․000 հա զբաղեցնող Կովկասյան կենսաբազմազանության ապաստարանն առաջին մասնավոր պահպանվող տարածքն է Հարավային Կովկասում: Ապաստարանը կառավարվում է Վայրի բնության և մշակութային արժեքների պահպանման հիմնադրամի (FPWC) կողմից: CWR և հարակից տարածքներն առանցքային նշանակություն ունեն Հարավկովկասյան կենսաբազմազանության պահպանման հարցում: Այստեղ են բնակվում այնպիսի հազվագյուտ կենդանատեսակներ, ինչպիսիք են գորշ արջը, բեզոարյան այծը, սև անգղը, մորուքավոր անգղը, հայկական իժն ու առաջավորասիական հովազը:

Տասնամյա գործունեության ընթացքում հատկապես ակնհայտ է բեզոարյան այծերի թվաքանակի աճը, ինչի մասին վկայում են նաև անտառապահների կողմից օգտագործվող տեսախցիկներն ու իրականացվող մոնիթորինգը։ Խոսուն օրինակ է նաև առաջավորասիական հովազի հայտնվելը Հայաստանում, որը բազմաթիվ անգամներ նկարահանվել է նաև CWR տարածքներում։