Հնդկաստանում վերջին 20 տարում ավելի քան 1 մլն մարդ է մահացել օձերի խայթոցից

Նոր հետազոտության համաձայն՝ վերջին 20 տարում Հնդկաստանում օձերի խայթոցից մահացել է 1,2 մլն մարդ, գրում է BBC-ն։

Զոհերի գրեթե կեսը 30-ից մինչև 69 տարեկան մարդիկ են, քառորդ մասը՝ երեխաներ:

Մեծ թվով մահվան դեպքեր են արձանագրվում հատկապես հնդկական վտանգավոր բունգարուսի (կրայթ), իժերի  և կոբրայի խայթոցների դեպքում: 

Ինչպես ասվում է հետազոտությունում, մահվան դեպքերի կեսը տեղի է ունենում մուսոնային սեզոնի ժամանակ՝ հունիս և սեպտեմբեր ամիսների միջև ընկած ժամանակահատվածում, երբ օձերը սկսում են աշխուժանալ։

Հաղորդվում է, որ հետազոտությունն անցկացվել է առաջատար հնդիկ և միջազգային փորձագետների կողմից:

Ներկայում օձերի խայթոցները Առողջապահության համաշխարհային կազմակերպության (ԱՀԿ) տվյալներով՝ «Առողջապահության ոլորտում համաշխարհային առաջնահերթություն ունեցող խնդիրներ» են:

Ամեն տարի աշխարհում օձերի խայթոցից մահանում է 81 000-138 000 մարդ։ Մոտ երեք անգամ ավելի շատ մարդ կարողանում է փրկվել կամ ամբողջ կյանքում հաշմանդամ է մնում։