Ուժի մեջ է մտել Ռուսաստանի դեմ ԵՄ պատժամիջոցների հինգերորդ փաթեթը

Եվրամիությունը հրապարակել է Ռուսաստանի դեմ պատժամիջոցների հինգերորդ փաթեթը, որն արդեն ուժի մեջ է մտել։

«ՌԻԱ նովոստի»-ի փոխանցմամբ՝ սահմանափակումների նոր ցանկում են Կալաշնիկով կոնցեռնը, ՊՆ պաշտոնական ներկայացուցիչ Կոնաշենկովը, Սբերբանկի ղեկավար Գերման Գրեֆը, ինչպես նաև Օլեգ Դերիպասկան, Կատերինա Տիխոնովան, Մարիա Վորոնցովան, Բորիս և Իգոր Ռոտենբերգները։

Ցուցակում հայտնված անձանց արգելվում է մեկնել ԵՄ, ինչպես նաև սառեցված են միության տարածքում նրանց բոլոր ակտիվները։ Ընդհանուր առմամբ փաթեթը ներառում է 217 ֆիզիկական անձ և 18 կազմակերպություն։

ԵՄ-ն նաև ընդլայնել է պատժամիջոցները VTB-ի, Sovcombank-ի, Novikombank-ի և Otkritie Bank-ի դեմ:

Ավելի վաղ հաղորդվել էր, որ նոր սահմանափակող միջոցները ներառում են սկսած 2022 թվականի օգոստոսից Ռուսաստանից ածխի ներմուծման արգելք, Ռուսաստանի դրոշը կրող նավերի մուտքի արգելք ԵՄ նավահանգիստներ, սահմանափակումներ Ռուսաստանի և Բելառուսի ավտոմոբիլային փոխադրող ընկերությունների համար։