Ոստիկանության բաժնում փաստաբանի նկատմամբ բռնություն գործադրելու դեպքով ՄԻՊ-ը սկսել է քննարկման ընթացակարգ

Ներքին գործերի նախարարության Ոստիկանության կենտրոնական բաժնում փաստաբանի նկատմամբ առերևույթ բռնություն գործադրելու դեպքի առնչությամբ Պաշտպան Անահիտ Մանասյանի նախաձեռնությամբ սկսվել է քննարկման ընթացակարգ:

Այս մասին տեղեկացնում է ՄԻՊ հանրային կապերի բաժինը:

«Այսօր տարածված տեղեկությունների համաձայն՝ ՆԳՆ Ոստիկանության Կենտրոնական բաժնում բռնություն է գործադրվել փաստաբան Կարեն Ալավերդյանի նկատմամբ։

Դեպքի կապակցությամբ՝ Պաշտպանի սեփական նախաձեռնությամբ սկսվել է քննարկման ընթացակարգ։ Համապատասխան գրություններ կհասցեագրվեն ՀՀ գլխավոր դատախազություն և ՀՀ ներքին գործերի նախարարություն՝ նշված դեպքի հանգամանքները մանրամասն և բազմակողմանի քննության առարկա դարձնելու պահանջով:

Հարկ է ընդգծել, որ փաստաբանի պաշտպանված մասնագիտական գործունեությունը երկրում մարդու իրավունքների պաշտպանության պատշաճ համակարգի կարևորագույն նախապայմաններից է, արդարադատության համակարգում և իրավունքի գերակայության ապահովման գործում այն ունի առանցքային կարևորություն»,-ասվում է հաղորդագրության մեջ:

Հիշեցնենք՝ Փաստաբանների պալատի խոսնակը երեկ հայտնել էր, որ Ոստիկանության Կենտրոնական բաժնում մասնագիտական պարտականությունները կատարելու համար ներկայացած փաստաբանին ոստիկանության բաժնի ծառայողները և պարեկները ենթարկել են բռնության:

ՆԳՆ ոստիկանությունից «Հայկական ժամանակ»-ին հայտնել են, որ հունիսի 7-ին նշյալ դեպքի առթիվ ծառայողական քննություն է նշանակվել՝ կրկին այլ մանրամասներ չհաղորդելով:

ՀՀ քննչական կոմիտեի մամուլի խոսնակ Գոռ Աբրահամյանն էլ մեզ հետ զրույցում հայտնել է, որ փաստաբանի նկատմամբ ենթադրյալ բռնության դեպքի առթիվ Քննչական կոմիտեում վարույթ է նախաձեռնվել՝ ՀՀ ՔՕ-ի 450-րդ հոդվածի 1-ին մասի հատկանիշներով (Խոշտանգումը):

Նշենք, որ, մամուլում հրապարակված տեղեկությունների համաձայն, ենթադրյալ բռնության ենթարկված փաստաբանը Կարեն Ալավերդյանն է: