Եկեք միասնաբար սրտացավ աշխատենք ավելի լավ արդյունքի համար. Կարեն Գիլոյանն ընդունել է Պարալիմպիկ կոմիտեի հավաքական թիմին

ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանն ընդունել է Հայաստանի ազգային պարալիմպիկ կոմիտեի հավաքական թիմին՝ կոմիտեի նախագահ Հակոբ Աբրահամյանի գլխավորությամբ:

Այս մասին տեղեկացնում է ԿԳՄՍՆ-ն։

Թիմը հոկտեմբերի 2-9-ը մասնակցել է Սոչիում կայացած Պարալիմպականների ամառային խաղերին, որի այս տարվա նշանաբանն էր՝ «Մենք միասին ենք. սպորտ 2022»: Խաղերին մասնակցել է 12 երկրի 1200 մարզիկ։ Հայաստանի հավաքական թիմը բաղկացած էր 9 մարզիկից և 4 կազմակերպիչից:

ԿԳՄՍ նախարարի տեղակալ Կարեն Գիլոյանը ողջունել է մարզիկներին և կարևորել նրանց մասնակցությունը տարբեր մրցույթներում:

«Շատ լավ է, որ սկսում եք հաջողություններ ունենալ: Եկեք միասնաբար ավելի սրտացավ, բաց ու ազնիվ աշխատենք ավելի լավ արդյունքներ արձանագրելու համար: Մեզ համար պարալիմպիկ սպորտը շատ կարևոր է»,- ասել է նախարարի տեղակալը և հավելել՝ մշակման փուլում է ադապտիվ սպորտի կենտրոն բացելու Կառավարության որոշման նախագիծը:

Խաղերում ընդգրկված մարզաձևերը 9-ն էին՝ թեթև աթլետիկա, լող, սեղանի թենիս, նետաձգություն, պարաթաեքվոնդո, սայլակներով սուսերամարտ, ֆուտբոլ, շաշկի և շախմատ: Հայկական թիմը մասնակցում էր 4 մարզաձևում՝ լող, պարաթաեքվոնդո, սեղանի թենիս և թեթև աթլետիկա (սայլակավազք):

Հայաստանի հավաքական թիմի մարզիկները վաստակել են 6 մեդալ: Սմբատ Կարապետյանը սայլակավազք մարզաձևում նվաճել է 2 արծաթե, իսկ Արման Սարգսյանը՝ 2 բրոնզե մեդալներ: Տիգրան Պետրոսյանը և Նաիրա Աղաբեկյանն արժանացել են բրոնզե մեդալների՝ համապատասխանաբար սեղանի թենիսի զուգախաղեր և թաեքվոնդո մարզաձևերում:

Այս սպորտային միջոցառման շրջանակում տեղի են ունեցել նաև հանդիպումներ մի շարք երկրների պարալիմպիկ կոմիտեների նախագահների միջև, որոնց մասնակցել են նաև ՌԴ նախագահի խորհրդական Օլեգ Լևիտինը, ՌԴ սպորտի նախարար Իգոր Մատիցինը և ՌԴ պարալիմպիկ կոմիտեի նախագահ Պավել Ռոժկովը: Քննարկվել են համագործակցության հեռանկարները:

Հայկական թիմի մասնակցությունն ապահովվել է Պարալիմպիկ կոմիտեի և «Զանգեզուրի պղնձամոլիբդենային կոմբինատ» ՓԲԸ-ի աջակցությամբ: