Հայաստանում ոստիկանը և փրկարարը պետք է դառնան ամենավստահելի մարդիկ. Սևանա լճում գործարկվեց Ջրային պարեկային ծառայությունը

Վարչապետ Նիկոլ Փաշինյանն այսօր Սևանա լճի հարակից տարածքում ներկա է եղել Ջրային պարեկային ծառայության գործարկման միջոցառմանը:

Միջոցառմանը ներկա են եղել ներքին գործերի նախարար Վահե Ղազարյանը, Տարածքային կառավարման և ենթակառուցվածքների նախարար Գնել Սանոսյանը, ԱԺ պատգամավորներ և պաշտոնատար այլ անձինք:

Վարչապետ Փաշինյանը հանդես է եկել ելույթով, որում, մասնավորապես, նշել է.

«Կառավարության հարգելի անդամներ,
Ազգային ժողովի հարգելի պատգամավորներ,
Ներքին գործերի նախարարության հարգելի գործընկերներ,
Ոստիկանության հարգելի ծառայողներ,

Շնորհավորում եմ բոլորիս ևս մեկ ստորաբաժանման ծառայության մեկնարկի առիթով: Պարեկային ոստիկանության ջրային ծառայության մեկնարկն ենք այսօր տալիս, ինչը շատ կարևոր իրադարձություն է:

Ըստ էության, մենք սրանով արձանագրում ենք, որ Հայաստանի Հանրապետությունում իրավակարգը գործում է բոլոր տեղերում, բոլոր անկյուններում: Այս առումով, շատ կարևոր է այս նոր ծառայության գործարկումը, որը նոր է նույնիսկ նոր ստեղծված Պարեկային ոստիկանության մեջ, որովհետև ծառայությունը հիմնականում կապված է լինելու Սևանա լճի վրա և ափամերձ տարածքներում իրականացվող իրավապահ գործունեության հետ:

Ուզում եմ շնորհակալություն հայտնել մեր միջազգային գործընկերներին այս հարցում նույնպես մեզ աջակցություն ցուցաբերելու համար: Խոսքը Ռուսաստանի Դաշնության կառավարության, Ամերիկայի Միացյալ Նահանգների մասին է, Եվրամիության մեր գործընկերները Պարեկային ծառայության ձևավորման առաջին օրից էլ մեզ աջակցում են, և այդ աջակցությունը շարունակական է:

Ընդհանրապես՝ մեզ ամեն անգամ թվում է, որ ահա, մոտենում ենք Պարեկային ոստիկանության եզրափակիչ ակորդին, բայց նաև իրականությունը, իրադրության իրական գնահատումն ինձ բերում է այն եզրակացության, որ ընդհանրապես, բարեփոխումներն ավարտ չեն ունենում: Խոսքը վերաբերում է նաև Ոստիկանության, Ներքին գործերի նախարարության բարեփոխումների գործընթացին:

Մենք այսքան երկար և հետևողական աշխատում ենք, Պարեկային ոստիկանությունն, ահա, այլևս ամբողջ հանրապետությունում իրողություն է:

Ո՞րն է հաջորդը՝ Ներքին գործերի նախարարության տրամաբանության մեջ առաջիկայում պիտի Քրեական ոստիկանության բարեփոխումներ իրականացնենք, Համայնքային ոստիկանության բարեփոխումներ իրականացնենք, պետք է հիմնենք Ոստիկանության գվարդիա, պետք է Ոստիկանության կամ Ներքին գործերի նախարարության ակադեմիան նոր որակ և շունչ ստանա: Առաջիկայում Պարեկային ոստիկանության ծառայության հետ կապված Օպերատիվ կառավարման կենտրոնի շինարարության ավարտին և բացմանն ենք սպասում:

Բայց, ընդհանուր առմամբ, եթե նույնիսկ հիմնադրման այս բոլոր աշխատանքները, երբ տեղի ունենան, բնականաբար, դրանով չի ավարտվելու բարեփոխման գործընթացը: Հարց կառաջանա՝ ի՞նչ է լինելու հաջորդը նույն Պարեկային ծառայության մեջ: Մենք այդ քննարկումներն սկսել ենք և այդ պրոցեսները շարունակում ենք, իրականացնելու ենք:

Հաջորդը լինելու հետևյալը՝ Ոստիկանության և Փրկարար ծառայության աշխատակիցների պրոֆեսիոնալ որակների բարձրացման շարունակաբար և անընդհատ գործընթաց պետք է տեղի ունենա: Մենք պետք է բոլորս գիտակցենք, որ ուզում ենք, և այդպես կլինի անխուսափելիորեն, որ Ոստիկանությունում կամ Պարեկային ծառայությունում ծառայեն լավագույն վարորդները, լավագույն մոտոցիկլետավարները, լավագույն նավավարները:

Փրկարար ծառայության բարեփոխումներն են առաջիկայում նախատեսվում: Փրկարար ծառայությունում, ինչպես և Ոստիկանությունում, ծառայելը պետք է լինի ամենահեղինակավոր աշխատանքներից մեկը Հայաստանի Հանրապետությունում:

Այս նրբության վրա ուզում եմ մեր բոլորի ուշադրությունը հրավիրել, որովհետև ոստիկանները և փրկարարները նրանք են, ում մարդիկ նեղ իրադրության մեջ հայտնվելու դեպքում դիմում են: Ընդհանրապես՝ մենք մեր առօրյա կյանքում ո՞ւմ ենք դիմում առաջինը, երբ մի խնդիր ենք ունենում. մեր ամենավստահելի մարդկանց: Հետևաբար՝ Հայաստանում Ոստիկանությունը և Փրկարար ծառայությունը կամ ոստիկանը և փրկարարը պետք է դառնան ամենավստահելի մարդիկ:

Ես ուզում եմ նորից բոլորիս ուշադրությունը հրավիրել հետևյալ հարցի վրա՝ Ոստիկանությունում, Պարեկային ոստիկանությունում կոմպրոմիսներ չեն լինելու, որևէ կոռուպցիոն երևույթ նկատվելու դեպքում, կամ նույնիսկ չպետք է թողնենք, որ նկատվի, կանխարգելիչ աշխատանք պետք է իրականացնենք: Պարեկային ծառայության և ընդհանրապես՝ այս նոր Ոստիկանության յուրաքանչյուր աշխատող պետք է ինքն իր համար արձանագրի՝ այս աշխատանքն իր համար երաշխավորված է այնքան ժամանակ, ընդ որում՝ սոցիալական երաշխիքների շարունակական ուժեղացմամբ, կամավոր ատեստավորման համակարգերով, աշխատավարձերի շարունակական բարձրացմամբ, քանի դեռ նա բարեվարք է և պրոֆեսիոնալ: Հետևաբար նրանք, ովքեր կհատեն բարեվարքության և պրոֆեսիոնալության նեգատիվ գիծը, այլևս Ոստիկանությունում, Պարեկային ծառայությունում չպետք է աշխատեն:

Հիմա պետք է շատ ուղիղ և թափանցիկ ասել՝ մեր հաջորդ գործն է Պարեկային ոստիկանության շատ ուժեղ ռեզերվ ձևավորելը: Ընդհանրապես՝ ուզում եմ հիշեցնել մեր այս հայեցակարգային պայմանավորվածության մասին. մենք բարեփոխումների արդյունքում պիտի հասնենք հետևյալ մեխանիզմին՝ Ոստիկանությունում աշխատանքի մտնելու և կարիերա անելու առաջին քայլը պետք է դառնա Պարեկային ծառայությունը, այսինքն՝ մեր բարեփոխումների այս փուլն ավարտելուց հետո, ով ուզում է դառնալ ոստիկան, առաջինը պետք է սկսի Պարեկային ոստիկանությունում աշխատելուց: Պարեկային ծառայությունն ինչ-որ տեղ պետք է դառնա խաչմերուկ Ոստիկանության համար: Բոլոր նրանք, ովքեր ոչ պրոֆեսիոնալ են և ոչ բարեվարք, պետք է դուրս գան ծառայությունից: Բոլոր նրանք, ովքեր պրոֆեսիոնալ են և բարեվարք, բնականոն կարիերա պետք է անեն Ոստիկանությունում. Ներքին գործերի նախարարության ակադեմիայի բարեփոխումների մեր տեսլականը հենց դրա համար է, որ յուրաքանչյուր փուլի և պաշտոնի համար, ինչպես այս դեպքում է տեղի ունեցել Պարեկային ոստիկանության հետ, պետք է անցնել վերապատրաստումներ, դասընթացներ՝ մեծացնելով իրենց պրոֆեսիոնալության և բարեվարքության մակարդակը:

Հարգելի ներկաներ,

Շատ կարևոր և խորհրդանշական իրադարձություն է մեզ համար, անձամբ ինձ համար: Ուրախ եմ, որ մենք այժմ Ոստիկանություն ասելիս, պատկերացնում ենք նոր գործարանային թողարկման ավտոմեքենաներ, այլ տեխնիկա, ճաշակով հագուստ, սոցիալական երաշխիքների ավելի բարձր մակարդակ: Եվ մենք այս ամենն անում ենք երկու պատճառով: Առաջինը՝ իհարկե, մեզ համար շատ կարևոր է Ոստիկանության ծառայողների հարմարավետությունը, շարժունակությունը, տեխնիկական հագեցվածությունը: Բայց, ի վերջո, եկեք չմոռանանք՝ Ոստիկանությունը և, մասնավորապես, Պարեկային ոստիկանությունը Հայաստանի Հանրապետության քաղաքացիների հետ շփվող, անմիջական շփում ունեցող առաջնային և ամենամեծ օղակն է: Ոստիկանությունը և Պարեկային ոստիկանությունը մեր պետության դեմքն է և մեր պետության կերպարը: Ուզում եմ ձեզնից յուրաքանչյուրի ուշադրությունը հրավիրել այս փաստի վրա և խնդրել, որ ինքներդ էլ առանձնակի ուշադրություն դարձնեք և Ոստիկանության առաջ եմ ես այդ խնդիրը դնում, ընդհանրապես՝ մեր բոլոր ուժային կառույցների, մեր բոլոր պետական ծառայողների մասին է խոսքը, սկսած՝ արտաքին տեսքից, վարվելաձևից, շարժուձևից, խոսելու ձևից, դուք այս համազգեստով և ծառայության մեջ ոչ միայն անհատ եք, այլև պետության ներկայացուցիչը, քաղաքացիներին ծառայություն մատուցող, իսկ օտարերկրացիների պարագայում՝ Հայաստանի Հանրապետության մասին պատկերացում տվող անձինք:

Հայաստանի յուրաքանչյուր քաղաքացի ձեզ հետ շփումից է ինքն իրեն որպես քաղաքացի գնահատում: Յուրաքանչյուր օտարերկրացի ձեզ հետ շփումներից է պատկերացում կազմում, թե ինչ է իրենից ներկայացնում Հայաստանի Հանրապետությունը: Եվ մեր խնդիրն է, որ Հայաստանի Հանրապետությունը ներկայանա որպես անկախ, ինքնիշխան, Սահմանադրական հստակ կարգով և իրավակարգով ազատ, ժողովրդավարական երկիր, որտեղ օրենքի գերակայություն է և որտեղ բոլորի իրավունքները պաշտպանված են:

Փա՛ռք նահատակներին և կեցցե՛ Հայաստանի Հանրապետությունը:
Շնորհավորում եմ բոլորիս»:

* * *

Ջրային պարեկային ծառայությունը՝ համագործակցելով մյուս գերատեսչությունների և ստորաբաժանումների հետ, բարձրորակ ծառայություն կիրականացնի հասարակական անվտանգության ապահովման, ինչպես նաև հանցագործությունների բացահայտման ուղղությամբ։

Պարեկային ծառայության մասնագիտական ստորաբաժանման ծառայողների հետ Սևանա լճում դասընթացներ են իրականացրել ԱՄՆ արդարադատության դեպարտամենտի ICITAP ծրագրի շրջանակներում ԱՄՆ-ից ժամանած հրահանգիչները։

Զուգահեռ իրականացվել են նաև տեսական պարապմունքներ, որոնք անցկացրել են «Սևան» ազգային պարկի, ՆԳՆ փրկարար ծառայության, կրթահամալիրի և պարեկային ծառայության Գեղարքունիքի մարզի գումարտակի ներկայացուցիչները։ Իսկ այս ամենին նախորդել էին միջազգային գործընկերների հետ համատեղ լայնածավալ աշխատանքներ, ջրային պարեկային ծառայությունում աշխատանքի անցնելու համար մրցույթներ, ստուգարքներ։

Երևան են տեղափոխվել Ռուսաստանի Դաշնության ներքին գործերի նախարարության տրամադրած նավերը, իսկ ամերիկացի գործընկերների հետ իրականացվել են ուսումնական գործընթացներ և մոդուլների մշակումներ։

Անհրաժեշտ մնացած գույքը՝ նավեր, սկուտերներ, ռադիոկապի միջոցներ, ջրային տեխնիկայի տեղափոխման համար նախատեսված ծառայողական ամենագնացների ձեռքբերումը, ինչպես նաև մոդուլային շենքերի կառուցումն ու կահավորումն իրականացվել և իրականացվելու է պետական բյուջեի միջոցներով։

Լողալու կարողությունների մակարդակի ստուգման մրցույթը հաջողությամբ հաղթահարած պարեկները ՆԳՆ կրթահամալիրում անցել են վերապատրաստումներ, ցամաքային և ջրային վարժանքներ։ Նրանք ուսումնասիրել են ջրային պարեկային ծառայության օրենսդրությունը, անցել են ֆիզիկական և կրակային պարապմունքներ։