Վրաստանում ՏԻՄ ընտրությունների երկրորդ փուլ կանցկացվի 20 համայնքներում և 42 ընտրատարածքներում

Վրաստանում ՏԻՄ ընտրությունների երկրորդ փուլը տեղի կունենա հոկտեմբերի 30-ին՝ 20 քաղաքներում և 42 մեծամասնական շրջաններում: Այս մասին շաբաթ կայացած ճեպազրույցի ժամանակ ասել է ԿԸՀ ներկայացուցիչ Նատիա Իոսելիանին:

«Ընտրությունների երկրորդ փուլը տեղի կունենա 20  քաղաքներում և գյուղական համայնքներում, ինչպես նաև տեղական մեծամասնական 42 ընտրատարածքներում»,- ասել է Իոսելիանին:

Քաղաքապետի ընտրությունների երկրորդ փուլը տեղի կունենա Վրաստանի հինգ խոշոր քաղաքներում՝ Թբիլիսիում, Բաթումում, Քութաիսիում, Փոթիում և Ռուսթավիում: Մայրաքաղաքում իշխող «Վրացական երազանք-ժողովրդավարական Վրաստան» կուսակցության ներկայիս քաղաքապետ Կախա Կալաձեն և «Միացյալ ազգային շարժում» ընդդիմադիր կուսակցության ղեկավար Նիկա Մելիան կպայքարեն քաղաքապետի տեղի համար: Չորս այլ քաղաքների մրցակիցները կլինեն նաև իշխող կուսակցության և ընդդիմության ներկայացուցիչները:

Վրաստանում քաղաքային ընտրությունների առաջին փուլը տեղի է ունեցել հոկտեմբերի 2-ին: Ընտրատեղամասերի 100%-ի տվյալները հաշվելուց հետո իշխող կուսակցությունը համամասնական ցուցակներում հավաքել է ձայների 46,75%-ը: Երկրորդ տեղում Միացյալ ազգային շարժումն է՝ 30,67%: Երրորդ տեղը զբաղեցրել է Վրաստանի նախկին վարչապետ Գիորգի Գախարիայի «Հանուն Վրաստանի» կուսակցությունը ՝ հավաքելով 7,81%: