Արսենալը կփորձի երկարաձգել պայմանագիրը Էդեգորի հետ

«Արսենալի» կիսապաշտպան Մարտին Էդեգորը մոտ ժամանակներս կարող է երկարաձգել պայմանագիրն իր ներկայիս ակումբի հետ։ Armsport.am-ի փոխանցմամբ՝ այս մասին իր Twitter-ում հայտնել է լրագրող Ֆաբրիցիո Ռոմանոն։

Ըստ աղբյուրի՝ լոնդոնյան ակումբի ղեկավարները մի քանի շաբաթվա ընթացքում կբանակցեն նոր համաձայնագրի շուրջ։ Վերջին վեց ամսվա ընթացքում Բուկայո Սական, Ուիլյամ Սալիբան, Գաբրիել Մարտինելին և Աարոն Ռեմսդեյլն արդեն երկարաձգել են իրենց պայմանագրերը «զինագործների» հետ:

Էդեգորը «Արսենալ» է տեղափոխվել 2021 թվականին։ Անգլիայի Պրեմիեր լիգայի 2022/2023 մրցաշրջանում կիսապաշտպանը մասնակցել է 45 հանդիպման։ Բացի խփած 15 գոլերից, նա նաև ութ գոլային փոխանցում է կատարել: