Անգլիայում ժամանելիս սուտ տեղեկության համար կսպառնա մինչեւ 10 տարվա բանտարկություն

Ցանկացածին, ով Անգլիա ժամանելիս սուտ տեղեկություն կներկայացնի ուղեւորության համար արգելված ցուցակի մեջ ներառված երկիր վերջերս կատարած այցի մասին, կսպառնա մինչեւ 10 տարվա բանտարկություն՝ կորոնավիրուսի վերաբերյալ նոր խիստ սահմանապահ քաղաքականությանը համապատասխան, փոխանցում է ABC News-ը:

Երկրի առողջապահության նախարար Մեթ Հենքոկը հայտարարել է, որ Մեծ Բրիտանիայի եւ Իռլանդիայի բնակիչները, որոնք Անգլիա կժամանեն կառավարության «կարմիր ցուցակի» մեջ մտցված երկրներից, պետք է ձեռք բերեն «կարանտինային փաթեթ», որը մեկ մարդու համար արժե 2400 դոլար եւ պետք է ծածկի կեցության, վիրուսի թեստավորման եւ այլ միջամտությունների ծախսերը:

Նրա խոսքով՝ կանոններին չհետեւող անձինք, այդ թվում՝ նրանք, ովքեր ժամանում են «կարմիր ցուցակի» մեջ մտցված երկրից, հյուրանոց չամրագրելով, կարող են տուգանվել:

Ներկայումս 33 երկրներից, ներառյալ Հարավային Աֆրիկայից, Պորտուգալիայից եւ ամբողջ Հարավային Ամերիկայից Անգլիա ուղեւորությունները փաստացի արգելված են՝ հիմնականում կորոնավիրուսի նոր տարբերակներով պայմանավորված մտավախությունների պատճառով:

Սակայն Բրիտանիայի եւ Իռլանդիայի քաղաքացիներին, ինչպես նաեւ Մեծ Բրիտանիայի այլ ռեզիդենտների մուտքը թույլատրված է պայմանով, որ նրանք ժամանելուց հետո 10 օր կինքնամեկուսանան:

Ընդ որում՝ նրանք չեն կարող մեկուսանալ իրենց տանը՝ ի տարբերություն այն երկրներից ժամանողների, որոնք մտցված չեն «կարմիր ցուցակի մեջ»: Դրա փոխարեն, նրանք հատուկ առցանց պորտալի միջոցով ստիպված կլինեն գնել փաթեթ, որի մեջ մտնում է կեցությունը, սնունդը եւ ՊՇՌ թեստավորումը:

«Ընդլայնված թեստավորման» ռեժիմը, որը լրացնում է մեկնելուց առաջ արդեն հաստատված թեստերը, պարտադիր է լինելու Անգլիա ժամանող բոլորի համար, եւ ցանկացածը, ով դա չի անի, կտուգանվի:

Մինչեւ 13 800 դոլարի տուգանք է սպառնում նրանց, ովքեր չեն բնակվի «կարանտինային հյուրանոցներում»: Մինչեւ 10 տարի բանտարկության ամենախիստ պատիժը սպառնում է նրանց, ովքեր կստեն «կարմիր ցուցակի» երկիր այցելելու մասին:

Այս միջոցառումների գործողության տեւողությունը կախված կլինի համավարակի տարածումից եւ այն բանից՝ վիրուսի նոր տարբերակները կխոչընդոտե՞ն արդյոք Մեծ Բրիտանիայում պատվաստանյութի արագ տեղակայմանը: Արդեն մոտ 12,65 մլն մարդ ստացել է առաջին դեղաչափը, ինչը համարժեք է մեծահասակ բնակչության շուրջ 20 տոկոսին: