ԱՄՆ-ում եւ Եվրոպայում կոչ են արել արգելել ցանկացած թռիչք Բելառուսի վրայով

ԱՄՆ Սենատի արտաքին գործերի հանձնաժողովի ղեկավար Բոբ Մենենդեսը, Չեխիայի, Լատվիայի, Գերմանիայի, Լիտվայի, Իռլանդիայի, Լեհաստանի եւ Մեծ Բրիտանիայի գործընկերների հետ միասին, հայտարարություն է տարածել Մինսկում Ryanair-ի ինքնաթիռի արտակարգ վայրէջքի կապակցությամբ եւ կոչ է արել արգելել բոլոր թռիչքները Բելառուսի վրայով, հաղորդում է «ՌԻԱ Նովոստի»-ն:

«Մենք կոչ ենք անում Քաղաքացիական ավիացիայի միջազգային կազմակերպությանն (ICAO) անհապաղ հետաքննել պետությունների միջեւ ազատ տարանցման ակնհայտ խախտումը եւ սպառնալիքներն ավիացիայի համար»,- ասված է Մենենդեսի մամուլի ծառայության տարածած հայտարարության մեջ:

Օրենսդիրները կոչ են արել դադարեցնել Բելառուսի անդամակցությունն ICAO-ին եւ «արգելել բոլոր թռիչքները Բելառուսի վրայով, այդ թվում` թռիչքները դեպի երկիր եւ երկրից», քանի դեռ հետաքննություն չի կատարվել:

Բացի այդ, հաղորդագրությունն առաջարկ է պարունակում ՆԱՏՕ-ի եւ ԵՄ երկրներին` պատժամիջոցներ կիրառել Մինսկի դեմ եւ կասեցնել Բելառուսի իշխանությունների կողմից «Ինտերպոլի եւ այլ միջազգային կազմակերպությունների օգտագործման հնարավորությունը Եվրոպայում ժողովրդավարության դեմ հետագա հարձակումների համար»:

«Մենք կոչ ենք անում անհապաղ եւ անվերապահորեն ազատ արձակել Ռոման Պրոտասեւիչին եւ բոլոր մյուս քաղբանտարկյալներին»,- նշվում է փաստաթղթում:

Ավելի վաղ հաղորդվել էր, որ Ryanair-ի օդանավը ականապատման մասին հաղորդումից հետո շտապ վայրէջք է կատարել Բելառուսի մայրաքաղաքում: Ապա պարզվեց, որ հաղորդումը կեղծ էր: Ուղեւորների թվում էր ընդդիմադիր Nexta Telegram ալիքի հիմնադիր Ռոման Պրոտասեւիչը, ում բերման ենթարկեցին փաստաթղթերը ստուգելիս:

Ինչպես պարզաբանել են Բելառուսի Պաշտպանության նախարարությունում, ինքնաթիռն ուղեկցելու համար օդ է բարձրացվել «ՄիԳ -29» կործանիչը:

ԵՄ երկրների շատ քաղաքական գործիչներ եւ եվրոպացի պաշտոնյաներ կոչ են անում միջազգայնորեն հետաքննել միջադեպը, որը նրանք երրորդ երկրների տարածքում ԵՄ երկու պետությունների միջեւ թռնող ինքնաթիռի հարկադիր վայրէջք են համարում: