Ջենովական «Բենեդիկտոս» ցիկլոնը Մոսկվայում. ՌԴ մայրաքաղաքում այսօր կգրանցվեն վերջին 69 տարվա ընթացքում ամենաառատ տեղումները

Երեկ երեկոյան ժամերից Մոսկվայում հորդառատ անձրև է սկսվել, հաղորդում է «ՌԻԱ Նովոստիի» թղթակիցը: Ըստ կանխատեսումների՝ այսօր ջենովական «Բենեդիկտոս» ցիկլոնը կհարվածի մայրաքաղաքին և կգրանցվեն վերջին 69 տարվա ընթացքում ամենաառատ տեղումները:

Մոսկվայի օդերևութաբանական կենտրոնի առաջատար աշխատակից Եվգենի Տիշկովեցի խոսքերով՝ տեղումների քանակը կհասնի մինչև 23 միլիմետրի, ինչը կազմում է ամսական նորմայի 40%-ը: Դա մոտավորապես նշանակում է մեկ քառակուսի մետրի համար երկու դույլ ջուր։

«Հորդառատ անձրևներին կեսօրից հետո կփոխարինեն ձյան տեղումները՝ մինչև 900 մ տեսանելիության նվազմամբ։ Մինչ այժմ օրվա ռեկորդը գրանցվել է 1952 թվականին (25,4 միլիմետր)»,- ասել է աղբյուրը:

Մոսկվայի քաղաքային ծառայությունները նախօրեին բերվել էին բարձր պատրաստվածության։ Արտակարգ իրավիճակների բրիգադները շուրջօրյա հերթապահություն են իրականացնում, իսկ այն վայրերում, որտեղ կարող է ջուր կուտակվել, տեղակայվել է հատուկ տեխնիկա։ Էներգետիկ ընկերություններին հանձնարարվել է պատրաստել վթարային սնուցման սարքեր։

Քաղաքացիներին խորհուրդ է տրվում հնարավորության դեպքում մնալ տանը, իսկ փողոցում լինել ծայրահեղ զգույշ՝ չթաքնվել ծառերի տակ և մեքենաները չկայանել դրանց մոտ, տրանսպորտային միջոցներ վարելիս խստորեն պահպանել արագության և հեռավորության կանոնները։