«Գերագույն դատարանը մեզ իսկապես հիասթափեցրեց. Ոչ մի իմաստնություն, ոչ մի քաջություն». Թրամփ

ԱՄՆ նախագահ Դոնալդ Թրամփն ասել է, որ ԱՄՆ Գերագույն դատարանն իրեն «իրոք հուսահատեցրել է»`որոշելով մերժել Տեխասի հայցը, այն է՝ վերանայել երկրում նոյեմբերի 3-ին կայացած նախագահական ընտրությունների արդյունքները, գրում է ՏԱՍՍ-ը։

Այս առնչությամբ նա գրառում է կատարել իր թվիթերյան պաշտոնական միկրոբլոգում, նշելով՝ «Գերագույն դատարանը մեզ իսկապես հիասթափեցրեց: Ոչ մի իմաստնություն, ոչ մի քաջություն»:

Հիշեցնենք՝ ավելի վաղ ԱՄՆ Գերագույն դատարանը մերժել էր Թրամփի կողմից աջակցություն ստացած Տեխասի գլխավոր դատախազ Քեն Փաքսթոնի հայցը ընդդեմ չորս նահանգների, որոնց շուրջ կատաղի պայքար էր ընթանում նախագահի թեկնածուներ հանրապետական Դոնալդ Թրամփի և դեմոկրատ Ջոզեֆ Բայդենի միջև:

Հայցվորն այն կարծիքին էր, որ Ջորջիան (ընտրիչների 16 ձայն), Միչիգանը (ընտրիչների 16 ձայն), Փենսիլվանիան (ընտրիչների 20 ձայն) և Վիսկոնսինը (ընտրիչների 10 ձայն) չեն համապատասխանել քվեաթերթիկների, այդ թվում ՝ փոստով ուղարկված, մշակման վերաբերյալ կանոններին: Այս առումով, նահանգներում ընտրությունների արդյունքները, ըստ հանրապետական գլխավոր դատախազի, պետք է անվավեր ճանաչվեն:

Փաստորեն, այստեղ խոսքը վերաբերում է ընտրիչների կոլեգիայից ավելի քան 60 ձայնին մարտահրավեր նետելու փորձին, ինչը կասկածի տակ կդնի Բայդենի հաղթանակը:

Այնուամենայնիվ, Գերագույն դատարանը եզրակացրել է, որ Տեխասն ի վիճակի չէ համոզիչ փաստարկներ ներկայացնել, թե ինչու է մարտահրավեր նետում այլ նահանգներում ընտրությունների անցկացման եղանակին:

Հիշեցնենք՝ չորեքշաբթի օրը Թրամփը Գերագույն դատարանին խնդրել էր իրեն որպես շահագրգիռ երրորդ կողմ ներառել Տեխասի հայցում: Բացի այդ, Տեխասի գործողություններին աջակցել էին ևս 18 նահանգներ, որոնք բոլորն էլ ղեկավարվում են հանրապետականների կողմից։

Իրենց հերթին պատասխանողները հինգշաբթի օրը միջնորդություն են ներկայացրել Բարձրագույն դատարան`հայցը մերժելու հիմքով: Ամերիկացի փաստաբանների ճնշող մեծամասնությունը, այդ թվում ՝ Հանրապետական կուսակցության շահերը ներկայացնողները, խոստովանում են, որ Տեխասի կողմից ներկայացված հայցը գործնականում հեռանկար չունի:

Նշենք՝ մինչև դեկտեմբերի 23-ը Սենատի նախագահը պետք է ստանա ընտրիչների կոլեգիայի քվեարկության արդյունքները, իսկ հունվարի 6-ին ՝ Կոնգրեսի երկու պալատների համատեղ նիստում, դրանք պետք է հաստատվեն: Հունվարի 20-ին տեղի կունենա ԱՄՆ նորընտիր նախագահի երդմնակալության արարողությունը: