Արգենտինայում բողոքի ցույցեր են անցկացվում ոստիկանի կողմից դեռահասի սպանության գործով
Ուրբաթ օրը ինքնաբուխ բողոքի ցույցեր են սկսվել Արգենտինայի Բուենոս Այրես նահանգի Միրամար քաղաքում այն բանից հետո, երբ ոստիկանը կրակել և սպանել է դեռահաս Լուչիանո Օլիվերին։ Այս մասին հայտնել է ՏԱՍՍ-ը՝ հղում անելով Todo Noticias հեռուստաալիքը ։
Քաղաքի բնակիչները հավաքվել են փողոցներից մեկում՝ պահանջելու դեպքի մանրակրկիտ հետաքննություն։ Ուրբաթ օրը ավելի վաղ Օլիվերի սպանության վայր են եկել նաեւ դեռահասի հարազատներն ու ընկերները։ Նրանցից ոմանք սկսել են քարեր նետել ոստիկանների ուղղությամբ, իսկ իրավապահները պատասխանել են ռետինե փամփուշտներով։
Դեռահասը գիշերը մոտոցիկլետով տուն էր վերադառնում, երբ ոստիկանական պարեկը հրամայեց կանգնել։ Նախնական տվյալներով՝ Օլիվերը չի ենթարկվել, ինչից հետո ոստիկաններից մեկը կրակել է նրա կրծքավանդակի շրջանում։ Ստացած վերքից Օլիվերը մահացել է, ոստիկանը ձերբակալվել է. «Նրա խոսքով՝ ինքը կրակել է պատահաբար, գործընկերներն անմիջապես բերման են ենթարկել»,- լրագրողներին ասել է Բուենոս Այրեսի նահանգային անվտանգության նախարար Սերջիո Բերնին՝ ընդգծելով, որ «ոստիկանի արարքը արդարացում չունի»։
Օլիվերի սպանությունը մեկ ամսվա ընթացքում երկրորդ նման աղմկահարույց դեպքն էր։
Կարծիքներ