Ռուսաստանը մեղադրել է ԱՄՆ-ին և ՆԱՏՕ-ին ԵԱՀԿ-ի «անկման» հարցում
Այսօր Եվրոպայի անվտանգության և համագործակցության կազմակերպությունը (ԵԱՀԿ) համակարգային դեգրադացիայի նշաններ է ցույց տալիս։ Այս մասին հայտարարել է ԵԱՀԿ-ում Ռուսաստանի մշտական ներկայացուցիչ Ալեքսանդր Լուկաշևիչը ԵԱՀԿ Մշտական խորհրդի այս տարվա առաջին նիստում, փոխանցում է ТАСС-ը։
Ռուսաստանցի դիվանագետը այս իրավիճակի համար մեղադրել է ԱՄՆ-ին և Հյուսիսատլանտյան դաշինքին։ Նրա խոսքով՝ ԱՄՆ-ն և ՆԱՏՕ-ն Ռուսաստանին զսպելու իրենց քաղաքականությամբ հանգեցրել են «ԵԱՀԿ տարածքում գործերի անմխիթար վիճակի»։
Հունվարի 12-ին Ռուսաստան-ՆԱՏՕ խորհրդի նիստին հաջորդած մամուլի ասուլիսում Ռուսաստանի փոխարտգործնախարար Ալեքսանդր Գրուշկոն ասել էր, որ նախկին խորհրդային մերձբալթյան հանրապետությունների մուտքը ՆԱՏՕ մեծ լարվածություն է առաջացրել Եվրոպայում։ Նրա խոսքով՝ Բալթյան երկրների՝ դաշինք մտնելը ռազմական առումով հանգիստ տարածաշրջանը վերածել է ռազմական մրցակցության ասպարեզի։
Գրուշկոն ասել է նաև, որ Ռուսաստանը միջոցներ կձեռնարկի իր անվտանգությանը սպառնացող վտանգը ռազմական ճանապարհով պաշտպանելու համար, եթե դա չկարողանա անել քաղաքական ճանապարհով: Նրա խոսքով՝ Ռուսաստանն ունի ռազմատեխնիկական, օրինական միջոցառումների համալիր, որոնք Մոսկվան պատրաստ է կիրառել, եթե անվտանգության իրական վտանգ զգա։
Կարծիքներ