2020-ին համաշխարհային օվկիանոսը կլանել է ռեկորդային քանակությամբ ջերմություն

Կլիմայագետները պարզել են, որ գլոբալ տաքացումը շարունակում է արագանալ, և 2020-ի վերջին համաշխարհային օվկիանոսը կլանել է ռեկորդային քանակությամբ ջերմություն: Հետազոտության արդյունքները հրապարակվել են Advances in Atmospheric Sciences ամսագրում:

Աշխատանքի հեղինակներից մեկը՝ Չինաստանի գիտությունների ակադեմիայի մթնոլորտային ֆիզիկայի ինստիտուտի պրոֆեսոր Լիցզին Չենը, նշել է, որ օվկիանոսները կլանում են ավելորդ ջերմության ավելի քան 90% -ը և արդյունաբերական ձեռնարկությունների, ավտոմեքենաների և այլ աղբյուրների արտանետած ածխաթթու գազի մոտ մեկ երրորդը:

«Ջրերի տաքացումն ուղղակիորեն ցուցադրում է, թե ինչպես է ընթանում գլոբալ տաքացման գործընթացը: Մեր դիտարկումները ցույց են տվել, որ կլիմայի փոփոխության արագացման երկարաժամկետ միտումը շարունակվում է», – նշել է մասնագետը:

Կլանելով ավելորդ ջերմությունը՝ օվկիանոսը դանդաղեցնում է կլիմայի փոփոխությունը, բայց դա բացասաբար է ազդում ջրային էկոհամակարգերի վրա: Բացի այդ, ավելի տաք օվկիանոսները և տաք մթնոլորտը նպաստում են ուժեղ փոթորիկների, թայֆունների առաջացմանը և մեծացնում ջրհեղեղների և հրդեհների վտանգը:

Հետազոտության հեղինակները մանրամասն ուսումնասիրել են, թե ինչպես են օվկիանոսները ջերմություն կուտակել 1955-2020 թվականներին:

Ինչպես ցույց է տվել վերլուծությունը, դիտարկման ողջ ժամանակահատվածում Համաշխարհային օվկիանոսի ջրերում կուտակված ջերմային էներգիան ավելացել է 380 զետտաջոուլով: Այդ ջերմության կեսից ավելին կենտրոնացած է օվկիանոսի վերին շերտերում, որտեղ մինչև 2020 թվականի ավարտը կուտակվել է ավելի քան 230 զետտաջոուլ ավելորդ էներգիա: Ջերմությունը օվկիանոս է թափանցել հիմնականում երկրի այն ափամերձ շրջաններում, որոնք գտնվում են աշխարհի ամենամեծ քաղաքների մոտ, այդ թվում՝ Միացյալ Նահանգների արևելյան ափի մեգապոլիսների մոտ, Հարավարևելյան Ասիայի, Ճապոնիայի և Արգենտինայի ափերի մոտ:

Գործընթացը հատկապես ակտիվ էր անցյալ տարի:

Ընդհանուր առմամբ, դա հանգեցրել է Համաշխարհային օվկիանոսի մակարդակի մոտ կես սանտիմետրով բարձրանալուն: Հաշվի առնելով այն փաստը, որ հիդրոոլորտը որոշակի ուշացումով է արձագանքում գլոբալ տաքացմանը, առաջիկա տարիներին ցուցանիշը կարող է կտրուկ աճել:

«Կլիմայի փոփոխության դեմ պայքարի և մարդածին ածխաթթու գազի արտանետումները նվազեցնելու հետագա ցանկացած համաձայնության դեպքում պետք է հաշվի առնվի, որ օվկիանոսներն արդեն կլանել են հսկայական քանակությամբ ջերմություն և կշարունակեն դա անել տեսանելի ապագայում, քանի դեռ մենք չենք նվազեցրել ջերմոցային գազերի մակարդակը մթնոլորտում», – ընդգծել է Չենը։