Անելիք ունի նաև հանրությունը՝ ճանապարհների պահպանման և մաքրության առումով

Հայտնի է, որ իշխանությամբ օժտված պետական կառավարման ոլորտի մարմինները՝ նախարարությունները, մշակում և իրականացնում են պետության քաղաքականությունը տվյալ ոլորտում:

Քաղաքականությունների և ռազմավարությունների մշակումը, դրանց տարողունակությունը չի կարելի որպես փաստարկ օգտագործել այդ ռազմավարությունների և քաղաքականությունների իրականացման գործում նկատելի և աննկատ բացթողումների և թերացումների արդարացման համար, և հակառակը:

Այս առումով, համաձայնեցված աշխատանքի լավագույն օրինակ է Հայաստանի Հանրապետության Տարածքային Կառավարման և Ենթակառուցվածքների Նախարարության գործունեությունը՝ եռանդուն նախարարի գլխավորությամբ:

Ճանապարհաշինարարության աննախադեպ ծավալները հանրապետությունով մեկ կարևոր են բոլոր առումներով:

Պետական կառավարման ոլորտի լիազոր մարմնի և տեղական ինքնակառավարման մարմինների կողմից իրականացվող աշխատանքներում անելիք ունի նաև հանրությունը՝ ճանապարհների պահպանման և մաքրության առումով:

Ճիշտ ժամանակն է, որ հանրապետությունում գործող տասնյակ բնապահպանական, և ոչ միայն, հասարակական կառույցները հանդես գան նախաձեռնությամբ՝ բոլոր նորաստեղծ և նոր վերանորոգված մայրուղիների երկայնքով՝ տեղանքին (լանդշաֆտին), բնակլիմայական պայմաններին համապատասխան նորատունկ ծառերի տեղադրման վերաբերյալ:

Ծառատեսակների ընտրության վերաբերյալ առաջարկները կարող են ներկայացնել մասնագիտացված հասարակական կառույցները՝ հաշվի առնելով տարիներ անց ճանապարհի յուրաքանչյուր հատվածից բացվող տեսահորիզոնի առանձնահատկությունները, հանրապետության մայրուղիներում գտնվող տեղական ինքնակառավարման մարմինների և բնակավայրերի բնակչության պատասխանատվության և պատվախնդրության հիմնաքար դարձնելով նորատունկ այդ ծառերի ոռոգումը, պահպանումը և խնամքը:

Հ. Գ. Կանցնի 10-15 տարի, ավելի ժամանակ. երախտագիտությամբ կհիշվեն այս ձեռնարկումն իրականացնողները

Ձոնիկ Մարգարյան