Ուկրաինական պատվիրակությունը վարչապետի գլխավորությամբ հաջորդ շաբաթ կայցելի Վաշինգտոն

 Հաջորդ շաբաթ ԱՄՆ մայրաքաղաք կայցելեն Ուկրաինայի վարչապետ Դենիս Շմիգալը, ֆինանսների նախարար Սերխի Մարչենկոն, Ուկրաինայի Ազգային բանկի ղեկավար Կիրիլ Շևչենկոն և մի շարք այլ ուկրաինացի պաշտոնյաներ։ ՏԱՍՍ֊ի փոխանցմամբ՝ այդ մասին շաբաթ օրը հաղորդել է Reuters գործակալությունը ՝ վկայակոչելով աղբյուրներ:

Նրանց խոսքով՝ ԱՄՆ այցի ընթացքում ուկրաինական պատվիրակությունը պետք է երկկողմ հանդիպումներ ունենա G7 երկրների ֆինանսական գերատեսչությունների ներկայացուցիչների և այլ պետությունների հետ։ Բացի այդ, ինչպես հայտնում է Reuters-ը, ուկրաինացիների մասնակցությունը նախատեսված է Ուկրաինայի վերաբերյալ կլոր սեղանին, որը Համաշխարհային բանկի կողմից կանցկացվի ապրիլի 21-ին։ Սա կլինի առաջին հանդիպումը Ուկրաինայի ֆինանսական գերատեսչությունների ներկայացուցիչների և նրանց արևմտյան գործընկերների միջև ռուսական ռազմական հատուկ գործողության մեկնարկից ի վեր։ Բանակցությունների արդյունքներով, ընդգծում է գործակալությունը, Արժույթի միջազգային հիմնադրամը կարող է փոփոխել համաշխարհային տնտեսական աճի իր կանխատեսումը։