Կրեմլում անհանգստացած են ԱՄՆ-ի կողմից լարվածության սաստկացման պատճառով

Ռուսաստանի և ԱՄՆ-ի հետագա բանակցություններում հստակությունը կերևա անվտանգության երաշխիքների վերաբերյալ Մոսկվայի առաջարկություններին ամերիկյան կողմի պատասխանն ստանալուց հետո. դրա հետ մեկտեղ Կրեմլում անհանգստությամբ են հետևում Նահանգների կողմից լարվածության սաստկացմանը: Այդ մասին, ինչպես տեղեկացնում է «Արմենպրես»-ը, հունվարի 25-ին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը:

Պեսկովին հարցրել են այն մասին, թե բանակցությունների ընթացքի վրա ազդո՞ւմ է արդյոք այն փաստը, որ ԱՄՆ-ն 8,5 հազար զինվորականների բարձր պատրաստության վիճակի է բերել Եվրոպա տեղափոխման համար:

«Բանակցությունների ընթացքի վրա չի ազդում, բանակցությունները, ըստ էության, ներկա փուլում ավարտվել են: Այն բանից առաջ, երբ ըմբռնում լինի, թե ինչպես և երբ մենք կշարունակենք, հարկավոր է ստանալ հենց այն հռչակավոր տեքստը: Մենք հուսով ենք, որ դա տեղի կունենա այս շաբաթ»,-նշել է նա:

«Իսկ այն, ինչը տեղի է ունենում թե՛ տեղեկատվական առումով, թե՛ դե-ֆակտո ԱՄՆ-ի կողմից լարվածության սաստկացման առումով, մենք ձեզ հետ հենց երեկ այդ մասին շատ ենք խոսել, այստեղ ոչինչ չի փոխվում: Մենք մեծ անհանգստությամբ ենք հետևում ԱՄՆ-ի այս գործողություններին»,- հավելել է Պեսկովը, հաղորդել է «ՌԻԱ Նովոստին»: