Ֆրանսիան առաջին անգամ դարձել է միլիոնատերերի թվով աշխարհում երրորդ երկիրը

Ֆրանսիայում ապրում է ավելի քան 2,8 միլիոն մարդ, որի կարողությունը գերազանցում է 1 միլիոն դոլարը։ Այս մասին «Արմենպրես»-ը տեղեկանում է ТАСС գործակալությունից։

Նշվում է, որ ըստ BFMTV հեռուստաալիքի՝ Շվեյցարիայի UBS բանկի՝ 2022 թվականի հաշվարկներով Ֆրանսիայում է ապրում  աշխարհի միլիոնատերերի ընդհանուր թվի 4,8%-ը։ Այս վարկանիշային աղյուսակում առաջատարն ԱՄՆ-ն է, որտեղ ապրում է միլիոնատերերի 38,2 %-ը (22,7 մլն մարդ), երկրորդ տեղում Չինաստանն է՝ 10,5 % (6,23 մլն մարդ) ցուցանիշով։

Ինչպես նշում է հեռուստաալիքը, Ֆրանսիան «առաջին անգամ զբաղեցրել է երրորդ հորիզոնականը՝ առաջ անցնելով Ճապոնիայից, Գերմանիայից և Մեծ Բրիտանիայից»։ Հանրապետությունը վարկանիշային աղյուսակում բարձրացել է այն պատճառով, որ թվարկված երկրներում նախորդ տարվա արդյունքներով զգալիորեն կրճատվել է միլիոնատերերի թիվը։ Այսպես, Ճապոնիայում այն ​​նվազել է 466 հազարով, Մեծ Բրիտանիայում՝ 439 հազարով, իսկ Գերմանիայում՝ 253 հազարով։

Ֆրանսիային հաջողվել է ոչ միայն չենթարկվել միլիոնատերերի թվի կրճատման ընդհանուր միտումին, այլև նույնիսկ աննշան ավելացնել նրանց թիվը (ընդամենը 25-ով):

Ըստ տնտեսագետների տվյալների՝ 2022 թվականին աշխարհում 3,5 միլիոնով նվազել է այն ​​մարդկանց թիվը, որոնց կարողությունը գերազանցում է 1 միլիոն դոլարը: Այս իրավիճակն առաջին անգամ է նկատվում 2008 թվականից ի վեր, ընդգծում է հեռուստաալիքը՝ դա կապելով գնաճի, տոկոսադրույքների բարձրացման և դոլարի համեմատությամբ որոշ արժույթների անկման հետ։

50 միլիոն դոլարը գերազանցող կարողության տերերի թիվն աշխարհում զգալիորեն քիչ է։ Ըստ UBS-ի՝ 2022 թվականին նրանց թիվը կազմել է 243 հազար։ Այս վարկանիշային աղյուսակում առաջին հորիզոնականը նույնպես զբաղեցնում է ԱՄՆ-ն (մոտ 124 հազար մարդ): Ռուսաստանը գտնվում է վեցերորդ տեղում (մոտ 4500 մարդ), իսկ Ֆրանսիան՝ իններորդում (մոտ 4000 մարդ)։

Ինչպես հաղորդում է հեռուստաալիքը, 2022 թվականին աշխարհում կար մոտ 59,4 միլիոն մարդ՝ 1 միլիոն դոլարից ավելի կարողությամբ: 2021 թվականին նրանց թիվը կազմում էր 62,9 միլիոն: Ըստ BFMTV-ի գնահատման՝ տասնամյակի վերջում միլիոնատերերի ընդհանուր թիվն աշխարհում կարող է հասնել մինչև 86 միլիոնի: