Էլինա Դանիելյան. Որքան մոտենում էի տիտղոսին, ավելի նյարդային ու լարված էի դառնում

Շախմատի կանանց Եվրոպայի անհատական առաջնության չեմպիոնի տիտղոսը նվաճած Էլինա Դանիելյանը լրագրողների հետ հանդիպմանն ամփոփել է իր հաղթանակը:

«Այս տարի Եվրոպայի անհատական առաջնությունը շատ հաջող ստացվեց ինձ համար: Նույնիսկ դժվարանում եմ ասել, թե ինչի համար այդպես ստացվեց այս տարի: Մոտ 1.5 տարի մենք ոչ մի մրցում չէինք ունեցել, և ես մի քիչ կարոտած էի դրան: Առաջին կեսից սկսած ես լավ էի խաղում ու միշտ առաջատարների խմբում էի: Բնականաբար, այդպիսի մրցումներում երկրորդ կեսն ավելի բարդ է ստացվում, քանի որ խաղում ես ավելի ուժեղ մրցակիցների հետ: Երկրորդ կեսում ավելի նյարդային էի և բոլոր պարտիաները, հատկապես՝ վերջին երկուսը, շատ բարդ էին ինձ համար ոչ թե շախմատային առումով, այլ՝ հոգեբանական: Որքան մոտենում էի տիտղոսին, իսկ ես զգում էի դա, ավելի նյարդային էի դառնում ու ավելի լարված էի խաղում: Երևի, ամենաբարդը վերջին պարտիան էր:

Ի սկզբանե, շատ լուրջ էի տրամադրված այս մրցմանը, որովհետև նախորդ տարիներին Եվրոպայի առաջնություններում առաջին կեսը լավ էի խաղում, իսկ երկրորդում ինձ մոտ չէր ստացվում: Այս տարի որոշեցի, որ երկրորդ կեսը ևս պետք է լավը լինի: Երևի, տրամադրությունից էր, շախմատի հանդեպ կարոտից, դա ևս մեծ կապ ուներ ինձ համար, քանի որ շատ էի կարոտել տախտակի վրա ֆիգուրներով քայլ անելը և մտածելը: Հուսով եմ, որ իմ այս հաղթանակը կնպաստի Հայաստանում կանանց շախմատի զարգացմանը, բոլոր աղջիկները կսկսեն շախմատ խաղալ ու մենք կունենանք շատ ուժեղ դպրոց, ինչիսին կա մեր հարևան երկիր Վրաստանում:

Կարող եմ ասել, որ մեր թիմի աղջիկներն ավելի շատ էին ուրախացել, քան ես: Հուսով եմ, որ այս հաղթանակն ավելի կմոտիվացնի նրանց»,- ասել է Էլինա Դանիելյանը:

Հիշեցնենք, որ Ռումինիայում անցկացված Եվրոպայի անհատական առաջնությունում Էլինա Դանիելյանը 11 հնարավորից վաստակել էր 9 միավոր` 7 հաղթանակ, 4 ոչ ոքի։ Նա միանձնյա գրավեց առաջին տեղը։

43-ամյա Էլինա Դանիելյանը 2001 թվականին դարձել է արագ շախմատի Եվրոպայի անհատական չեմպիոն, 2003 թվականին Հայաստանի հավաքականի կազմում դարձել է Եվրոպայի թիմային չեմպիոն, 2011-ի Եվրոպայի անհատական առաջնության բրոնզե մեդալակիր։