Կրակոցներ՝ Գեղարքունիքում. դեպքի վայրում հայտնաբերվել է 8 պարկուճ, 1 ինքնաձիգ, 2 ատրճանակ

Երեկ՝ սեպտեմբերի 20-ին, կրակոցներ են հնչել Գեղարքունիքի մարզում։ Ոստիկանության Գավառի բաժնում օպերատիվ տեղեկություններ են ստացվել, որ Գավառ վարչական շրջանի Գանձակ բնակավայրում բնակիչը ինքնաձիգից անկանոն կրակոցներ է արձակում։ Այս մասին հայտնում է shamshya.com-ը:

Ըստ կայքի՝ ոստիկանները փողոցում նկատում են ենթադրյալ կրակոցներ արձակող քաղաքացուն և փորձում են  նրան վնասազերծել, սակայն վերջինս իր ձեռքին եղած ինքնաձիգով կրակահերթ է արձակում դեպի օդ, ապա դիմում փախուստի։

Ոստիկանները հետապնդում են այդ քաղաքացուն, սակայն վերջինս մտնում է Հակոբ Պարոնյան փողոցի N 6 հասցեում գտնվող առանձնատան բակը։  Արդեն տեղում մարզի ոստիկանապետի և Գավառի ոստիկանապետի գլխավորությամբ սկսվում է այդ քաղաքացու հետ բացատրական աշխատանքներ տարվել, սակայն այդ տղամարդը դարձյալ հրաժարվում է կատարել ոստիկանների օրինական պահանջները, այն է՝ ցած դնել զենքը և ինքնակամ հանձնվել։  Տևական ժամանակ արդյունք չտալով՝ այդ քաղաքացին առանձնատան պարսպի վրայով դիմում է փախուստի, սակայն այս անգամ ոստիկանների հմուտ գործողությունների արդյունքում հնարավոր է լինում նրան վնասազերծել, ապա տեղափոխել ոստիկանության Գավառի բաժին։ 

Տեղում դեպքի վայրի զննությամբ Գանձակ բնակավայրի Հ. Աբրահամյան և Հ. Պարոնյան փողոցների խաչմերուկում գտնվող մթերային խանութի դիմացի հատվածից հայտնաբերվել է թվով 3 հատ, Հ. Պարոնյան փողոցի սկզբնամասից՝ 4 հատ, իսկ Հ. Պարոնյան 6 հասցեում գտնվող առանձնատան բակից՝ 1 հատ 5.45 մմ տրամաչափի ինքնաձիգի կրակված պարկուճներ։ 

Իսկ առանձնատան բակում հայտնաբերվել է 1 հատ «ԱԿՍ» տեսակի ինքնաձիգ՝ իր պահունակով, 1 հատ «Մակարով» տեսակի ատրճանակ՝ 2 պահունակով, «Պարաբելում» տեսակի ատրճանակ՝ 1 պահունակով, 670-ից ավելի «Մակարով» տեսակի ատրճանակի փամփուշտներ, 100 հատ «ՏՈԶ» տեսակի որսորդական հրացանի փամփուշտներ, 220-ից ավելի ինքնաձիգի տարբեր տեսակի փամփուշտներ, 100 հատ «Պարաբելում» տեսակի ատրճանակի փամփուշտներ, 8 հատ «Մակարով» տեսակի ատրճանակի փամփուշտներ և  պարկուճներ։ 

Գ. Շամշյանի տեղեկություններով՝ բերման ենթարկվածը Գեղարքունիքում հայտնի «Գավառի բախտագուշակ Վարսիկի» տղա՝ 41-ամյա Սարգիս Հակոբյանն է։ Վերջինս փաստի առթիվ նախաձեռնված քրեական վարույթի շրջանակում հայտնել է, որ այդ ամբողջ զեն-քզինամթերքը ինքը ձեռք է բերել արցախյան 44-օրյա պատերազմի ժամանակ։